أوراق ممطرة الجزء السادس والثلاثين

(460)



.
.

.





الحرب ..

دمعة حلم تقراه السنين ..

أو هي مسافة ظلم

واشواك وعنّا ..

أو نبض يتمادى على خد الضيا

والدمع يشبه للحنين ..!



لاتسألين ..!

كل الحكايات القديمة

تشبه أحزاني

وأنا كلي رضا بالراحتين ..!



يعني بلا حمّى انتظار

ولا تعب

الخطوة اللي ماتصل

تبقى أصل

واللي رحل شوق وأنين ..!



يافتنة الليل المبين ..

نورك عزف باوتار روح

من كثرها

من صبرها

ماعدت أميز بالجروح

كل المدى

دمعة رضا

تحت انتظار النور

ويل الصابرين ..!



.
.

.

(461)


.
.

.




الصابرين : يشابهون العصافير
غربة تسامرهم / و هجرة بلا ذنب


إلى متى واحنا مع : " خير ياطير "
لاخير في صبري / ولا خير بالقلب ..!


.
.

.

(462)


.
.

.




القلب كوب العاطفة وانتي المااء
إلى متى والكوب عطشان ياروح


تعالي بحضن السما نكتب أسماء
ونلعب مع الغيمة وانا اجيك واروح


العمر فيه اشياء واشياء واشياء
وانتي لحالك عمر في قلب مجروح ..!




.
.

.

(463)


.
.

.




" مجروح " ماهي حرف في بال شاعر
كيف أختصرها نبض .. والجرح عيّا



جرحي خسارة عمر .. صبر وخناجر
والنور بايدك .. ليت نورك تهيّا ..!


.
.

.



(464)



.
.

.





تهيا لي خيالك في سحابه
تأملتك وقلت اليوم تمطر


تحريتك مع الغيمه ولكن
جفافي لمني مني ويكبر


أحس عروقي تغالب عروقي
وانا في وحدتي كسبان واخسر


يمر الليل يسألني حنينه
واقول يمون خلي وانت تبشر


مسائي ماعرف للنور بابه
وصبحي غايبٍ في قولة : أصبر


حياه أغرب من الغربة بعيني
ونبض الحال فيني عاش ممطر ..!


.
.

.


(465)


.
.

.




ممطر على أي حال وهذي القصه ..
لاتسأل الغيم عني وأنت بامطاري


العمر نصه حنين / وضعت في نصه ..
وانت العناوين / وانت الغربه / وداري ..!!



.
.

.

(466)




.
.

.




داري عيونك .. وانت نور عيوني
وهذا المساء المرّ : فيني طوّل


أنا أنتظر نورك .. وأعيش ظنوني
والصبح من دونك مساء تحوّل


تعال وأشرب من عروق جنوني
الحب ..! ماعمره جفا / يتأول


انت الوحيد اللي يموت / بدوني
وانا بدونك / لـ الأمان أتسوّل


تدري بدونك كيف عشت طعوني
لاشعر / لاقيمه .. وأنت الأول ..!!




.
.

.
(467)


.
.

.




الأول احساس الوطن في عروقي
وغيره يجي بعده .. ولاهان راسه


يعني بكل إحساس هي كل طوقي
هيّ الوطن والحب وأهله وناسه


ماغيرها فيني سلبني بروقي
ولاغيرها ممطر ومجنون كاسه


ماغير أرتب لإنتظاري خفوقي
واشعل فتيل الوجد تحت الحراسه


وآآقول للدنيا : هي أمطار ذوقي
جتني على الخاطر وحسبة مقاسه


هيّ السما وآآنا تمايل عذوقي
غيمه ورى غيمه بليا فراسه


هي كل ما أملك من أطفال شوقي
ياكثرهم فيني " حروب وشراسه "


أهديتهم كلي .. وضاعت حقوقي
ولاباقي إلا نبض ساري بفاسه


يحرث سماه .. ويزرع الليل فوقي
وانا تحت ظل التعب في سلاسه


أهدم جفا وقتي .. وأطير سبوقي
وأجني مع الغصة جروح الكياسه


ياليتني ماعشت داخل عروقي
أو ليتني ماشفت بالعقد " ماسه "...!!




.
.

.



(468)

.
.

.




ماسه بعقد الناس ماتشبه الناس
ما هي بغيمه هي سما كل غيمه


مجنونها ممطر وهايم وحسّاس
في كف يحملها وفي كف ديمه


من دونها يشهق مع حزنه أنفاس
ومن دونها ماعاد لـ الشعر قيمه ..!!




.
.

.


(469)

.
.

.



قيمة أحاسيسي بعيني كبيره
والانتظار يموت ماحوله أحباب


صوت السنين اللي ملاني زفيره
ماريّح جروحي ولا ريّح اهداب


صعب انك تعيش الأماني كسيره
والاصعب تغادر وحزنك على الباب


أيدين روحي مارقت لـ الأميره
مع ان طول الحلم أكبر من اسباب


ليه الزمن يرمي علينا حصيره
ولغيرنا يفرش مواويل واعناب


أحس جيش الحزن فينا مسيره
وأحس فينا ثورة جروح وغياب


أنتي وأنا طفلين داخل جزيره
أغراب فيها نحتضن حبر وكتاب


أنتي وأنا مثل السنين الأخيره
ماتعرف الفرحه ولا وصل واحباب ..!!