(400)
.
.
.
ورق ويطيح من غصن الزمن ليله / وكان وكان
ويرقا من جذوع أحزان صبري .. بيرق التخمين
وانادي للمسا / للريح / وابدا صفحة النسيان
والقى روح تكتب روح .. لايمكن تصير أثنين
كتبت اربع مية غيمه / وأمطر بالحنين انسان
يعيش الما حياه / ويهدي الما في عروق الطين
وليله من بعد ليله .. سنين وترتوي باحضان
وتسهر في عيوني غصة القسوة / ودمع اللين
ألا ياروح عبدالله .. وروح السيل / والأوطان
متى هذا العمر يبدا .. قلي لي لامتى تكفين ؟؟
أنا أدري في عيونك / ويش معنى جمرة الألوان
وانا أدري في غرامي / كيف رسمي ماعرف تلوين
أنتي بس / بلحالك .. عيوني / والمدى أزمان
وش باقي على همس الجمر في رحلة التكوين ؟
يمر الليل باحضاني / كسير .. وخاطره ذبلان
والقا في طيوفك / رحلة الما .. تبتدي من عين
فديتك / يابعد كل الحروف .. ودمعة الأحضان
فديتك / كل ما مرَ المسا يحكي / جفاف التين
أحبك .. كل ماشق الصباح / بجفنك الخثران
وأحبك .. كل ما غنى النهار اسمك / بلا تلحين
أحبك .. كل مارفَ الجنون وداعب الأغصان
أحبك .. كل ما تفاحة الما .. تنقسم نصين ..!
أحبك ياكثر ماقلت أحبك .. والسبب عنوان
أكررها لجل / أتنفس أنفاسك .. بدون تجين
ألا يارحلة الما / ياحدود الغيم .. والأوطان
أوراق المطر جفت .. ولاجف الغلا تدرين ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لـ كل من تابعني هنا
لا أستطيع أن أحصر الأسماء على مسافة أربع سنوات واكثر في هذا المتصفح
وما أستطيع أن اقوله هو
شكراً أحبتي
شكراً لكل حرف خطته رسائلكم
شكراً لكل اتصال هاتفي وردني منكم
شكراً لكل رسالة خاصة من أعضاء المنتدى
شكراً لكل المشاعر التي رافقتني بكم هنا
شكراً لكل إحساس صادق أضاف لي الكثير
شكراً لكل من قرأ حرفاً واحداً
أعلم أن الشكر قليل ..
ولكن ما أملكه من مشاعر لكم أحبتي هو مايغنيني عن تقديم قوافل الثناء لكل منكم
فـ شكرا من روح عبدالله التي تفخر بكم يا أصدقاء ..
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(401)
.
.
.
تدرين عينك قدرها .. وش يساوي
وتدرين .. عن سر أختلاف الموازين
أنتي وطن روحي / ولالك مخاوي
أنتي لحالك : ثورة الماء والطين
أنتي مطر هالنبض / والشوق كاوي
بالأنتظار ... تموت كل الشرايين
تذبل وتشقى .. تنتظر بالرجاوي
تدعي سماها .. مثل كل المساكين
حبك بحر .. وآآنا غريق الهقاوي
آمنت بك / من قبل أراضيك بسنين
أنتي أنا .. يعني معك عشت راوي
من غيرك غصون الفرح مالها ايدين
من دون نبضك / دنيتي وش تساوي ..؟
ولـ أجل عينك .. قلت : تكرم مية عين ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(402)
.
.
.
عين روحي مارضت تفرح بـ عيد
دون ماتهديك / نبض الأمنيات
ياعسى أيامك .. فرح طلعٍ نضيد
والسعادة .. تخترق كل الجهات
عيدي بروحك / يزيد / ويستزيد
وافرح بقربك .. وأعيد الذكريات
أشرب الماضي / من اطراف الوريد
واسقي الآآآه .. بأمل في ذا الحياة
وابتسم وحدي .. وأنا ماني وحيد
دامك بروحي / فأنا جمع الصفات
شامخٍ راسي / حناني لك فريد
دافيٍ نبضي / وعقلي في ثبات
منك / من جور اشتياقي / لاجديد
نار تاكل .. كل ماراحت وجات
حسبي الله عالزمن / ياهو شديد
كم تمنيته يحنّ .. بلا شتات
الله أكبر .. لو يحس بما أريد
ماهداني موت .. من قبل الممات
حسبي أنك / في عروقي لك نشيد
كل لحظه ينقري .. فرض وصلاة
ويكفي أنك : " نكهة العيد السعيد "
" كل عام وروحك أعذب مـ الفرات ..! "
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(403)
.
.
.
الفرات الروح / والدم المسيل
وانتي بكلك .. مداين من خصال
كل عيد آقول : ماباقي حصيل
وكل يوم آقول: حلمي بالوصال
ليت لي قدره .. على مو ت النخيل
كان ماعشت العمر .. كلي ظلال
انتظاري صمت ووصالك صهيل
لامتى والفارس يموت بـ جدال ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(404)
.
.
.
جدال الليل / تأنيب السجاير
وترويض الحزن / ليله حزينه
أسامر مابقى من حلم .. جاير
واداري قلبي ورعشة حنينه
أشوفك صوت في صمت الستاير
وأشمك عطر بكفوف المدينه
تخيلت السما نبض وحراير
لقيت أنك مطر .. روحه سكينه
وجفت بعدك غصون وعشاير
ومال الحظ .. ميل الياسمينه
أحبك / ليه قالوا الحب كافر
وبك روح المدى / نبضه سنينه
صحيح الموت فرقا من تعاشر
ولكن للأمل .. نحيا رهينه
عيون العمر .. كم فيها نسافر
وكم نبكي .. على الحلم وندينه
وكم في العمر حب ؟ بلا مشاعر
وكم من حب نحيا وسط عينه ..!!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(405)
.
.
.
عينه تزم الملح سكر ..
لجل ماينبت على خصر الليالي
يأس من طول انتظار ..!
في يدينه
مارسم قطره بعد قطره
ولا بيده نقش معنى الفرح
ليله بعد ليله
ولا حصّل نهار ..!
هو أمل
يشبه لفوضى الشمس
من بعد احتضار ..!
هو مسافة موت
تشبه توت
في باقة سما
فيها من اصناف البشر
عادي
وكم عادي ركب خيل الزمن
واصبح مع ربعه قطار ..!
هو لحاله
مارفض روحه
ولاكرر مساءاته
سدى
يوم المدى
ينبض معه
وتعيش به كل المدن
يوم المدن صارت معاني للحصار ..!
هو مطر ماهو مطر
هو أماني صحو
في عز الشتا
في خريف اللحظه
يعاند مساءه بالحوار ..!
هو عنيد
ولا يزيد الما عطش ..!
بعد الجفا
مات الجفا بيده
وغاب النور
في لحظة خريف
وصارت الروح المزار ..!
كل ليله
هدّ حيله
من فراغ الكل
يبني بعض مايمكن
يسمى شوق
بعد الشوق
مافارق حنينه واستدار ..!
هو وطن
ماله وطن
هو حكاية غربه أمست
تحتري نور الصباح
ولا صباح
ولا أمل
كل الحروف الماثلة تصلب
وترقا روحها
في غفلة الليله
وتكتب بالسما
" آآآنا أحبك باختصار " ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(406)
.
.
.
باختصار / الليل مايرحم أحد
ولا يمر الليل من دون احتضار
كل نجمه تهتدي باب الوعد
وكل ضو يمدد الحلم بنهار
اشتعال الليل روح بلا جسد
والهزيمه حلم ماعاش انتصار
كم نروّض فتنة الحزن بجلد
وكم نساير بالزمن كسر الجدار
الغريق ان صاح ماحوله مدد
والسفينه داعبت غدر البحار
الحصار يعيش عمره ماخمد
والحرار تموت من ذل الحصار
وش بعد نبكي .. سألتك وش بعد
خلني ساكت وخل الليل نار
كم تعودنا نموت ابلا سعد
وكم تعودنا نقول الحظ جار
الليالي طعمها .. حزن وكمد
ولا خبرت الليل يرحمه النهار ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(407)
.
.
.
النهار احساس روح / تعيش بالليل النهار
ماعلى الدنيا ملام / ولا على احساسي عتب
شفت فيك النور واكثر / شفت معنى الانصهار
شفت كل السحر وأمطر .. في يديني لك ذهب
الحروف الماس وانتي .. جيد محتاج انتصار
والهزيمة كل مابي .. دون ما أعرف سبب
أنتي الأولى وغيرك .. ماله بقلبي مطار
مانجح غيرك .. وغيرك داخل عروقي رسب
ياغريبه ياحبيبه .. مالنا فينا اختيار
في جبين الروح كاتب : أنتي أحلا ما انكتب
كل مابي طار لجلك / والمدى بالروح طار
ومابقى بالغصن غير / أجساد ملعونة شبب
باختصار : الملح سكر / مابقى بيدي مرار
باختصار : انتي لروحي تاج واحساسك ذهب ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(408)
.
.
.
ذهب ولا جواهر أو كنوز مثمنه وألماس
ولا تسوى بميزان الغلا لمسة من ايدينك
أنتي فتنة الدنيا / سماء النور والاحساس
أنتي كل شي / وكل شي يعيش تلحينك
غيابي من غيابك والعنا مافارق الأنفاس
ولا ليله تمر إلا .. أخاوي قسوتك لينك
تمريني وأمر الحزن لجلك / وافتح الكراس
وانقش في تفاصيل المطر مايحتوي طينك
أنا مهما أموت الليل .. برفع بالصباح الراس
لأن النور بالدنيا .. سطع من فتحت عينك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(409)
.
.
.
عينك صباح أطفال في ليلة العيد
عينك شموخ السيل والجرح وادي
أمرّها في كل لحظة .. ولا آعيد
إلا اشتياقي .. يوم حظي رمادي
واحيا بها ذكرى وفرحه وتنهيد
وآموت صاخب حزن والشكل هادي
و ش حيلتي والجمر مافارق القيد
والشوق مايرحم جموح المنادي
لاقلت أنا مشتاق .. ماودي آزيد
أخاف أزيد الحمل بين الأيادي
ماودي أهديك التعب والأناشيد
ولا نشيدي موت والحزن زادي
كني غريب يعيش في لعنة البيد
ماذاق غير الحلم بين البوادي
يقرا غصون الصمت بين العناقيد
ويكتب حنينه كل ما مرّ شادي
ياليت شوقي ماوقف للتقاليد
وياليت قلبي مارقا للمبادي
ولا خذيتك غصب والأيد بالأيد
وآقول للعالم : ترى الحب عااادي ..!
ليست هناك تعليقات:
إرسال تعليق