(193)
.
.
.
الباب والشوق وانفاسي
______ والحال والليل والنسمه
كانت على غيمة احساسي
______ تمطر ولا تمطر البسمه
سألت من غيرهم ناسي
______ قالوا .. مفاتيحك بوسمه
قلت الزمن ماطفى باسي
______ باقي على دمعتي رسمه
لو عاش بالحلم كراسي
______بكتب لروح الزمن أسمه
هو كل ربعي وجلاسي
______ هو روح ماتعرف القسمه ..!
(194)
.
.
.
القسمة ان جت عادلة جتك روحي
________ وبدون عدلك قسمتي غربة الروح
يا آخر اطياف الغلا هاك لوحي
________ أكتب على الغربة تعافيت بجروح
كم ابتسم لاشفت زحمة جروحي
________ أغليتها من كثر ماعشت بك بوح
ماهمني وش كثر قالوا بروحي
________لاصرت روحي صوتهم عافية روح ..!
(195)
.
.
.
روح تسكن روح ..
والباقي سماااء ..!
لا جفاف ولا اعتناء ..
كل مابالنور ظلما ..
والعيون الذابلة حمَى رجاااء ..!
يا أمير النور ياطعم البقاء ..
ماسألني عنك غيرك ..
يوم عانقت السحاب المختلف جمره ..
وترحيبي سماااء ..!
هات بعضي ..
لجل بعضك ..
لجل يتسامى على شارع حنيني
صوتك العذب الضياااء ..!
ياحبيب النبض ..
يانبض المساااء ..
مالتعريف الدموع إلا غلا ..
يسكن مواويل الحياة ..
ويحتفي بفراقنا ..
صوت انتماااء ..!
مابكيتك ..
ماهويتك ..
مارجيتك ..
ما احتويتك ..
ما عطيتك ..
ما لقيتك ..
كل ما بالأمر .. نقش لـ روح .. في مجرى الدمااء ..!
(196)
.
.
.
الدماء ..! الرابط اللي مايهاب
______ من جنون العمر أو صمت الغريب
بيني وبيني حضورك بالغياب
______ والغياب ان طال .. شمسك ماتغيب
أستلذ الموت في حضن الشباب
______ وش حياتي ؟ لابدا راسي يشيب
كل مايمكن / غريب بلا ثياب
______ وكل حلم أغرب ولا حوله رقيب
الحبايب سقف والأغراب باب
______ والليالي مهزلة .. حبّ و حبيب
مابهالدنيا صحيح من الصواب
______ ولا بهالدنيا خطا .. دامه نصيب
انتي لحالك على جفن الكتاب
______ دام عيني حبر .. عينك ماتغيب ..!
(197)
.
.
.
تغيب الناس وأنتي في عيوني
________ وكل الناس تحضر في عيونك
أضيع بدونك .. بشكلي ولوني
________لحالك بـ الفضا..والغيم لونك
أغاني هالمطر تسقط بدوني
________ وأغاني هالسما تنمل دونك
جنونك بعض ماءه من جنوني
________ فديتك الما وتلويحة جنونك ..!
(198)
.
.
.
جنونك غير ..
روحك غير ..
عنادك غير ..
خيالك غير ..
وانفاسك وش انفاسك ..؟
وانا وحدي على باب السما .. همسة حنين وطير ..!
.
.
أضرب جناحـي واستفـز السحابـه
وأمطر على صدرك بغيم اغترابي
ماللسنـيـن حـسـاب والعـمـر غـابـه
فيها الردى أغصان والحزن رابي
يابـنـت قلـبـي يــا حـنـيـن الكـتـابـه
ماعـاد لـي غيـر الشقـا فـي كتـابـي
وش تنتظر روحـك بصبـح الكآبـه
هيـا تعالـي وافتـحـي صـبـح بـابـي
الـدرب طاعـن شـوك مالـه رتـابـه
والخطـوه اعـذب مايجـنـن تـرابـي
كلك على بعضـك جنـون السحابـه
وكلـي حنيـن ولـو تـمـادى عـذابـي
(199)
عذابي صمت واشجار الحكي ماريحت لي بال
_________ أيا حضرة جناب الروح تعال ودلل أغصاني
يعود العيد بعد العيد .. وانت بخاطري تثنال
_________ مثل سيلٍ على سيلٍ .... يحلّ ويهدم أركاني
ضمى والما على بابي .. جفاف ودمعتين وحال
_________ متى ياعيد بفرح بك وانا ادور على احضاني ...!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(200)
.
.
.
أحضاني الليله صباح ومواويل
________ يسعد حنين الصبح بعيـون غالي
الشوق مال بخاطري ميَل الليل
________ هذي .. مـوازين الغلا في خيالي
كلمة ( أحبك ) .. مالها أي تعليل
________ روح وسما / والرفرفه بالعلالي
لاتسأليني عالمطر واسمي السيل
________ يكفي من الما / غربتي وارتحالي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(201 )
.
.
.
ارتحالي ليل وعيونك صباح
_______ وبينهم ياروح مدري من أنا
كل ماعاشرت أنفاس الجراح
_______ اغتسل بالدمع واحلام الهنا
استبق نبضي بترتيل الرياح
_______ وعقرب الأيام ..مايوم أنثنا
الحكاية غابة الصمت اجتياح
_______ والكلام دفاع لـ عيون العنا
لو يطير الطير من غير الجناح
_______ كان طرت بحلم ماعمره دنا
البلا عشاق لأصناف الرماح
_______ والبلا ترتيب دنيا لـ الفنا
رحلة الغربة تعاويذ الصباح
_______ ورحلة الما في تعابيري أنا ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(202)
.
.
.
أنا ..!
أنا أصعب من احساس الحنين ..
اللي يخيَط معطف الذكرى ..
ويتحول جناح ..!
أنا حلم اليقين المبتدي ..
بعد العمر ..
قبل انحسار النور ..
أو ماقبل يترامى على جوفي ..
ألم طعم الرياح ..!
أنا صوت المطر ..
لادق باجراسه ..
على شباكك المايل ..
وغنى للصباح ..!
أنا كوكب اللاسلم ..
لاصارت ثواني غربتي ..
حرب وصياح ..!
أنا غيث السنين المرتوي ..
زحمة عطش ..
وايديني الشاهد
على كسر اعتياد الجرح ..
لارفرف على صدر المسا طيفك ..
وتم الإجتياح ..!
أنا روح انشطار الفجر..
في قلبك ..
اذا غرد على بالك ..
وغنى لك تراتيل المباح ..!
أنا تعريف عاشق ..
تأتأ الحب بخجل ..
وانثال في مسمع نبوغه
صمت ورصاص الجراح ..!
أنا ماني أنا قد قلتها ..
لكن على طيش السحابه ..
ضاعت أنفاسي ..
وضاع اللي رسمته ..
من تفاصيل السماح ..!
أنا ماني أنا ..
بآقولها أكثر ..
واردد ياسما روحي ..
وياروح المطر ..
مشتاق لك كثرك ..
وكثر النور ..
لاداعب خيالي ..
في مراجيح الأمل ..
أو كثر ماحولي نباح ..!
أنا ماني أنا
لو عدتها ..
بآموت ..
من غصة دموع الشوق
وارتال الحنين الواقفة ..
في حلق خطواتي ..
تساومني عليَ ..
ولا درت ..
أنك بعين العقل أو عين السما ...
أغلا وشاح ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(203)
.
.
.
وشاح الصبح بعيون الأمل مايعترف باوطان
__________ ندى من همس يتذكر.. مسافاتك وخـطواتي
صباحي نكهة حضورك وليلي ماغشاه احسان
__________ صباح الياسمين اللي .. ذبل داخل مـلفاتي
صباح العطر ياعطر الحقيقة .. والمدى نيشان
__________ صباح البندق اللي ثار من تجويف حسراتي
صباح الرحمة .. بعين الكريم العالي الرحمن
__________ صباح الصبر .. والغيمة تبسم في مسافاتي
صباح الما .. وتاريخ المطر في ثورة الانسان
__________ صباح النبض .. يانبضٍ تعلاَ فـوق غاياتي
صباح السيل .. ياروح الحنين الضافي الأحضان
__________ صباح انفاسك وكلك .. صباحٍ مرمر اوقاتي
صباح النور يانور الحروف وشمعة الأوطان
__________ صباح الأرض ياكل الدروب ونبض خطواتي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
204)
.
.
.
خطواتي بوجه الريح دايم
_______ ولا مليت من ريـح التجافي
أشوفك كل يومٍ في حكايه
_______ وحرفي عاش لك بالدمع وافي
كتبتك شمس تسكن في عيوني
_______ قريتك حلم روح بقلب ضافي
سرقتي فرحتي ماهو بكيفك
_______ وانا مثلك سرقتك في ضفافي
نعيش العمر حزن ولا غلبنا
_______ سوى دمعٍ تمنع بـ الخوافي
أعيشك ودي آعيشك معايه
_______ آضمك في هدب وقتي وكافي
أماني في زمن موت الحقايق
_______ يموت الحلم بـ سنينٍ عجافي
ولا يفرق مع الأنسان حلمه
_______ مدام الله يدري بـ الخوافي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(205)
.
.
.
الخوافي على باب الرجا سنبله
________ والسحابه برقص الما تعلَ القلوب
استقي ياجنود الطيب من أسهله
________ المطر للأراضي ذنب عيا يتوب
الليالي شتا .. والبرد من حلله
________ والضلوع العفيفه .. ماتمل الهبوب
ياصباح الحنين ويادروب الوله
________ كم بقى للخطاوي والعما للدروب
كل ما المس صباح الحزن واتأمله
________ ينمحي في يديني كل حلمٍ طروب
ياغروب الصباح الممتلي بسمله
________ الموازين ظلما والصباح الغروب
هات كف الجنون وهالحنين اقتله
________ هات كف الوصال ولا تعلَ القلوب ..!
ليست هناك تعليقات:
إرسال تعليق