(289)
.
.
.
أنتظار الصبح / دمعات اليتيم
في يدينه حلم .. ماحوله نهار
كل ماشبَ الأمل .. شب الهزيم
واستفاق الرعد من بعد احتضار
وارزمت فوقه .. مداراتٍ تضيم
لا مسار / ولا ديار / ولا قرار
وابتدا ينظم من اوجاعه / حميم
والرياح تفلَ من صدره / وقار
كنه غيوم السما .. وايده سديم
كنه اللي ضاع في صمت الجدار
يرسم الذكرى .. ودمعه يستقيم
غصته تشبه حصار بلا حصار
في خياله .. يحضن الحلم القديم
ويبني الحاضر .. على وهم الديار
شوقه أكبر من عنا الوقت اللئيم
والحنين يعيش به .. حلم انتصار
لو درى أن العشق / مواله عظيم
ماعشق ليله.. وذاق الإنكسار ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(290)
.
.
.
الإنكسار ودمعة الليل والريح
ماخلت أحلام المطر ترتويني
بين السنين آطيح وآقوم وآطيح
غريب في زحمة حزن يحتويني
ياصبح وينك مابقى فيَ تجريح
لا ليل ذاب ولا وطن يحتريني
واقف على حد الشفق ودي آزيح
غيمة ظروف تعلَ باقي سنيني
ياذا الزمان المرَ .. لا وين بآصيح
دام العذوبة صمت بآعيش فيني ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(291)
.
.
.
فيني من احزان الطيور ارتحالي
وفيها من اغصان الغلا كل الاشجار
رحلة جنون .. تزيد غربة سؤالي :
ليه البحر ماحسَ باحساس بحار ..؟
ليه الزمن يوقف على حلم غالي ..؟
ليه الأمل مكتوب بالمااء والنار ..؟
ليه السما فوضى لزحمة خيالي ..؟
ليه المطر مابلل .. الحضن والدار ..؟
كني فقيرٍ .. جاه ضيف الليالي
وعشاه بنته .. لجل مايفقد انوار ..!
أيا زمن شفني .. وشف كيف حالي
أزرع من فتات الألم .. حلم واصرار
وآمرر الدمعة بصدري .. لحالي
وآقول يكفيني .. من الصبح تذكار
هذا أنا .. واللي بقى لي سؤالي :
ليه الغياب يطير .. والحلم ماطار ..؟؟
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(292)
.
.
.
ماطار من عيني ( سهر ) وانت فيها
الله واكبر .. لامتى وانت عيني ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(293)
.
.
.
عيني وطن والما شعوبٍ مظاليم
تعال واحكم بالعدل في عيوني
الليل طوَل والضيا ملَ تقسيم
تعال لمَ اللي بقى من شجوني
فيك الأمل ماجف ياروعة الديم
وفيني غيوم الوجد ماريحوني
تعال فيني قبل ماآموت تكريم
واشرب غلاك وقلهم فارقوني ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(294)
.
.
.
فارقوني ماعليَه من ذنوب ومن حيايا
يكفي من الليل ذنبٍ .. ماتعزيه السنين
كل يوم يمر مرَ / آحس بعروقي شظـايا
كل يوم يعيد نفسه .. والبقا صوت الحنين
مشتري غربة زماني / بالحمول وبالرزايا
وبايع الفرحه لغيري .. واكتفيت العابثين
كني بروحي لروحي / عشت مافيني خطايا
كل ذنبي .. شوق قلبي / وارتعاشي والأنين
لاتسمون اعترافي : صبح / ودموعي مرايا
كل مابالأمر / ليل .. وتمتمة قمرا لـ طين
غربتي ثوب الطريق ولا علي من العرايا
دامني خاويت دمعي .. ماابي رحمة يدين ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(295)
.
.
.
يدين تتعكز على ظهر الايتام
وايدين ماتلقى سراب استغاثه
زمن ردي ماعاش به غير الاقزام
وين السنابل والطعون الحراثه
تبا لكم ياشلة الكذب الاورام
راح الوطن وانتم بطيش الخباثه
ماعد لكم عندي تقاسيم واقلام
في خاطري تباً لصوت الغثاثه
آقولها وآنا ابن زنان .. مادام
فيني شجاعة رمتها بالوراثه
بآعيش حرَ ولا عليه من أقزام
دام العمر واحد : عليَه أثاثه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(296)
.
.
.
أثاثه .. مطر
صمته مجاديف السما
والغيم بعيون المدى .. يبكي عليه ..!
الأسئلة بحر السنين
ولالقا للأجوبة مينا ..
بصدره يحتويه ..!
من يشتريه ؟؟
قلبٍ تولع بالصباح العذب
يمشي غصب
والخطوة بهمَه تكتويه ..!
من يسامرغصته غيره
ويسهرها وَله ..
مدري تعب ..
مدري مسافة عمر في ليلٍ كريه ..!
ياوجد من خله بعيد
ولا جديد
دمع وعنا
حلم أنثنى
والروح وايدينه تبيه ..!
زحمة خيال
ولامجال إلا لصخب الياس
في صمت المداين
والرحا بغبارها في داخله ..
تطحن عروقه تفتديه ..!
الله ياطيفٍ يجيه ..!
ألوان والحان ومطر
واحساس ماعمره يكون
إلا بذكرى تلتويه ..!
ويعيش بالغصة أنين
ولا ثمين
إلا الحنين ..
الغافي بنبضه وأرضه ..
واحتمالات السما ..
لاصار للأزرق وجيه ..!
ما أجملك ياحلم
لامريت بدروبه
وصرت أغلا وطن
وانت الوطن ..
في عرف ماء الروح ..
لا قرَر بلحظه يرتويه ..!
تعاااال ...
واسكن في عروقه
في تعابيره و فيه ..!
في حنايا تمطر بنورك عيونه
وانت بعيونه عيونه
وانت كل اللي بقى له ..
من سموَ الغيم والدنيا وما تملك يديه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(297)
.
.
.
يديه في جمر العنا / تبكي الريح
والريح .. ماتسأل عن اللي بكاها
لاوين ياصبح المدى تطعن الشيح
وتغيب .. في دنيا غريبه سماها ..
.. تمطر تعب والليل ماكف تسبيح
كنه على جال الشقا .. ماقراها
ياليل كم باقي من الهمَ وتطيح
الحلم .. روعة رحلته مابداها
العمر خنجر .. والليالي مجاريح
ياحسبي الله عالدما من شراها ؟؟
الصبح مايوقف على هبة الريح
والا رقيت جبال محدن رقاها ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(298)
.
.
.
رقاها غيم .. وامطر غربتينه
وطن وجروح من فارق عيونه
تعب يسكن تعب والليل توَه
بدا يرسم خطاويه ولحونه
ألا يا غربة الحال المريره
جنونك سيل .. عذبني جنونه
ينام ولا ينام .. وكل طيشه
مطر ..! ماريح عروقه ونونه
تساؤل في تساؤل والإجابه
غريب يعيش ويموت بجفونه
من اللي قال هالدنيا سهاله ؟؟
من اللي قال هالدنيا حنونه ؟؟؟
تعبت الشمع والدمع ارتكبني
ورق هالليل ملتني غصونه
أناجي من يروح ومن يجيني
على غفلة غلا .. وآعيش دونه
كأن النور خطواتي لحالي
وكل الكون مظلم في ركونه
ألا ياغربتيني .. ياهلا بك
هلا بالجرح .. واشكاله ولونه
تعب ..! هاك العروق وكل مابي
وعطني بس لحظه في عيونه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(299)
.
.
.
عيونه في غدير الفقد شمعه والجفاف الليل
وصوته في ممر الذاكرة نبضي وشرياني
على بحة صداه آعيش ويعيش الحزن وتميل ..
.. عناقيده على صدر الغلا وآطير باحزاني
وحيد إلا من جنونه .. غريب ولا معي تعليل
سوى كلمة " أحبك موت " ولاَ "ما معي ثاني "
له الغيمه / له الديمه / له اغلا مايسيل السيل
له اثقال السنين اللي .. تمادت داخل اوطاني
فديته كل ماهلَ المطر .. وتمايلت به خيل
من الفرحه تقول ان المطر ينزل على شاني
ألا ياليت بآروض حصان الحلم بالتدليل
ولكن الأمل وقف مداه وصاح .. باحضاني
تعبت آمد لك كف الزمان .. ولا تهدَ الحيل
وجاوبته بآآآه من الزمن كم زلزل أركاني
صباح ولاصباح وغيم يسأل لا متى الترتيل
صبر يطعن صبر والدم حسرة والمدى فاني
ألا ياعمر كيف العمر دونه والظروف تميل
على عكس اتجاه النبض روحي دوم تعصاني
ألا ياشرفة الدنيا .. عيونه هي حياة الويل
أنا وين أختفي عني .. ولا آمره بشرياني ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(300)
.
.
.
بشرياني مطر وانتي سحابه
وأراضينا جفاف وحزن غافي
تبلل هالورق والمااء صابه
وصار من التعب بستان ضافي
(300) ثلاث مية أنين ولا غرابه
مدامك صبح / عمري لك عوافي
يقولون السهر ماله قرابه
وانا له أبن عم .. وشيخ وافي
نسجت من العروق اللي تشابه
خيالك والسنين وعشت دافي
أمرر هالسؤال ولا إجابه
قوافي في قوافي في قوافي
متى بالقاك ياروح السحابه
متى هالحزن يرحل من ضفافي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(301)
.
.
.
ضفافي غيم واوطان ومشاعر
تعيش بروعتك .. دنيا رخيصه
أنا لوعشت كل العمر شاعر
لعينك والوطن .. ماهي نقيصه ..!
ليست هناك تعليقات:
إرسال تعليق