(157)
.
.
.
بعدين ..
أو بُعدين ..
شاحت وحنا اثنين ..
جمر الصبااح المرَ ..
وجفن الضيا والعين ..
وانتي بحفلة روح .. تسأل غيابي وووووين ..!
ياسيدة روحي
(.... ) ..
ولك روحي
لك زحمتي فوحي
لك كل مافيني من نكهة التلوين ..!
لاتسأليني وين ..
وانتي طريق العين ..
في كل خطواتي
همي وهمساتي ..
آحس بوجودك
كل ما لمحت اثنين ..!
ياسيدة قلبي
ماعاد لي قلبي
نبضات دم ودم ..
مدري خلايا هم ..
اللي أعرفه زين ..
أنك ملكتيني
وانتي عناويني ..
أو ساكنه فيني ..
او عايشه بروحين ..!
ياسيدة هالناس ..
من رتب الإحساس ..
من غربل الأوتار
وطفى البحر بالنار ..
غيري وغيرك مين ..!
ياحلوة التخمين ..
هات الضيا والهمس
هات الممات من امس ..
قصدي نعيش اليوم
ونسلسله بكره
واحيا معك يومين
وآموت بك يومين
وآعيش بك هالعمر ..
وتموت بي ذكرى ..
واسال طريقي وين ..
ونجاوب الاثنين ..
روح وغرام وعين ..
وين الطريق الصعب
واحنا الملك والشعب ..
وكل اختياراتي
انك ضيا ذاتي
وانتي معي تدرين
وماني معي تدرين ...!
(158)
.
.
.
تدرين عن قلبي وتدرين عني
_______ وتدرين كم باقي من الشوق ماراح
أنتي لحالك بس .. مني ومني
_______ وانتي لحالك عاشقة سر الأرواح
يافاتنة ماظن بك / خاب ظني
_______ ولو تسكنين النور .. بآجيك فلاح
أحمل على كفي جنون التمني
_______ وانثر على بابك مطر فيك يرتاح
يافاتنة تدرين عني .. وعني
_______ هات الضيا ماعاد للنور مصباح ...!
(159)
.
.
.
مصباح ليلي عليه آون
_______ والصبح ماعاد يعنيني
كلي مفاتيح حلم وظن
_______ يا ربـ ما ليه تشقيني
المااء من غيبته ماعن
_______ والنور مافارق ايديني
كني عليه اشتكي أو كن
_______ عزة خيالي تبكيني
من صبحي المرَ جيت آكن
_______ شوقي ولهفة شراييني
ياغاليه هالجفاف لمن ؟
_______ إلى متى القرب يشقيني
متباعدة / والدروب تحن
_______ متقاربة / فيني وفيني
الماء والطين قالت غن
_______ ولحنت لك كل تكويني
انتي ضيا الماء نمبر ون
_______ وماغيرك أحدن يعنيني
(160)
.
.
.
يعنَيني جنون الشوق ..
وأشتاقك ..!
يعنَيني دفا صدرك ..
وأشتاقك ..!
ألا وش حيلتي بالشوووق ..
لاجا يحتفل فيني
وانا ذايب بأعماقك ..!
قريت الكف والفنجال ..
وصبري مابقى به بال ..
تموت ارواح تحيا ارواح ...
وانا لاحي لاميت ..
أطير بهالسما وحدي ..
وجنحاني هي أوراقك ..!
فديت اللول لامن ساح
فديت العطر لامن فاح ..
فديت الما وروح الما ..
ليامن سلسل اشراقك ..!
زوايا بوحك وفوحك
دروب تلمني مني
وآضيع بزحمة الغيمات
مطر يسأل ولا يذبل
جوابه موت بـ فراقك ..!
(161)
.
.
.
فراقك ويل ..
دقايق أو ثواني أو شهر ..
ماعاد يسندني سوى همسك ..
ونكهة صوتك الذايب ..
بأنفاس المطر رايب ..
جنوووون وهيل ..!
ألا يافاتنة روحي
غلاك أثمن من جروحي
وصبحك خيل ..
يغنيني ..ويهديني
جمال الكون في كلمة
" أحبك .. ياحبيبي حيل "..!
ألا ياروح من غناك
أدور من رضاك رضاك
دخيل الليل
لمي مابقى مني
وغني لي
" تعبت اشتاق "
وأغني لك ..
" أنا عيوني على سورك ..
يابنت النور ..
ياعطر الليل ..
وهمس الليل ..
أنا فيني الأمااااااني ..
ســــــــيل .. ســــــــيل .. ســــــــيل "....!
(162)
.
.
.
سيل حب وسيل شوق وسيل ماااء
________ سيل لـ عيونك ولـ اللكون الوسيع
من نشدني .. قلت شف باب السمااء
________ عدَ قطرات المطر / صيف وربيع
واقرَ فيها ختم نبضات الضياااء
________ تعرف ان المااء .. عمره مايضيع
يكفي ان الماء معناه / أنت ماء
________ يكفي ان الروح ... تشري ماتبيع
(163)
.
.
.
تبيع الناس وتجيني .. تلم الحال واتبعثر
_________ ولا ندري من اللي ضاع في زحمة أغانينا
قريبه بعدها عني .. مسافة حلم لا أكثر
_________ أموت بـشوقـي السافر .. ولا تذبل أمانينا
غواية نبض مجنونه خرافه عطرها أحمر
_________ وأشم عـطورها فيني .. وفا يكتب أسامينا
تسافر بي على بحر الغلا .. وشراعها أكبر
_________ يرفرف بيرق الحب المسافر في موانينا
ونثمل في حضارة روح ينكرها زمان اغبر
_________ ولكن / مايهمَ الكون .. دام جـنوننا فـينا
(164)
.
.
.
فينا عطش مدري وله .. فينا شعور .!
يسبح مع الأقواس في لحظة صفا .. طير وفضا وبحور ..!
رسمة أمل ..
ولا زمن يكفر بوجه البور ..!
ياسيدي المأمور ..
بعض انشطاري ليه
وبعض النسا لبيه
ماتدري أني جيت ..
كلي مطرمحفور ..
في ذاكرة عصفور ..!
أسأل ترد الناس
ونعوذ مـ الخناس
ونرجع بلا مرجع ..
ونسايس الدستور ..!
وأسأل أنا مجنون
ويجاوبون عيون
أنسى ياعم أنسى
وخلك بعين الحور ..!
قلت السبب ياعم
ماللحكايه فم
قلي متى قلي
هذا الوطن يلتم
وازرع من اشواقي
بنت ودفا وحضور ..
يشبه لبنت النور ..
في ذاكرة مخمور ..
يمشي على كيفه
دام الزمن ريشه
في هالفضا المكسور ..!
ياعمي المخمور
يكفي غبا مسعور
أشتقت لأشواقي
والبنت باحداقي
تسأل علي تثور
ويجاوب المأمور
راحت عليك وراح
كل العمر وارتاح
يمكن تحس أنك
بعضك بكى منك
وتزور بعض الدور
وتلقى الجفا صنبور
وهذي السما حبلى
كلمة .. مطر .. ودهور ..!
(165)
.
.
.
دهور / ولا يوم / ولا دقيقه
_____ ماغبت عني / في عيوني مكانك
متعلق برمشي وكنك غريقه
_____ ولا غمضت عيني تلخبط كيانك
لجلك خطفت الغيم سيلت ريقه
_____ واهديت كلي /لجل أدور حنانك
انت بسباق العمر دور طريقه
_____ وآنا علي آطير والحق حصانك
إما نعيش العمر نشرب حقيقه
_____ ولانعيش الحلم .. داخل جنانك
أنت السحاب اللي ترازم بريقه
_____ وأنا الذي مايوم / نزلت شانك ..!
(166)
.
.
.
شانك علو وكل مافيك عالي
_______ من مبسمك .. لآخر متاهات ظلك
انت الضيا مهما تمادى خيالي
_______ الشمس بعضك والضيا من محلك
أدري غلاك أكبر جنون احتمالي
_______ يا أحتمال الروح .. من هو يملك
كلك على بعضك سكاكر سؤالي
_______ وكلي على بعضي تمنيت كلك ..!
(167)
.
.
.
كلك خيول ..وجامحه ..
بعد انكسار الضي
تبدا بك فروسية غرام
تعيد ترتيب السحاب ..
وتوزن اللاوزن ..
روح مسامحه ..!
يامهد تعريف الحضاره
جيت لك ثورة بدو
بيدينهم رحمة ونور
وجباههم في آخر العالم
بنور مصافحه ..!
يافتنة الدنيا
أنا كلي رهينك
في يمينك
شوفي احساس المدى فيني
طيور تصبح العالم
بعينك سارحه ..!
(168)
.
.
.
سارحة متسامحه ..
فيها القلق غيمه ..
تركب خيال المدى تبرير ..
تثور
تهدا
تزم انفاس
تتفاءل
وتفرد جناح القلق وتطير ..!
وارتب شـ معنى انتظار
يمكن ألاقي
صبح يكسر رمح
فيه الثواني ورد
والحزن ماعاد به تعبير ..!
يافاتنة هاتي الأنفاس
خلي العنا يقرا بنا
كنا هنا .. في رحلة المااا خير ..!
هاتك ضيا
ولا جنون
ولا سما
ولا حرير ..
ماهمني وش نحتفل
بس نحتفل
في زحمة احساس الوله
نكتب سقينا بعضنا
يوم الجفاف البير
يوم الجفاف البير ...!
.(169)
.
.
.
البير صدري / والدلو عين مجروح
_______ والحزن اخ / وكل ربعي جروحي
دمعة تشق البال / والدمع مفضوح
_______ ماينستر .. وآآنا ذبحني وضوحي
كل مادفنت بخاطري غربة البوح
_______ يسيل صبري وارتمي قبل نوحي
تعبت مني والبقا حسرة الروح
_______ تعبت زفرة تحتفل وسط روحي
قلي متى يارب / بآعيش مسموح
_______ من ذنب ماجيته .. يفتت جموحي
يارب وحدك عالم الحال والروح
_______ وحدك تلمَ الدمع وتعين روحي ..!
(170)
.
.
.
روحي ..! تدرين وش روحي ..تدرين وش معنى أنا .. أنتي .. ومعنى الليل لاذاب بعروقي ..
من شروقي قبل ميلادي .. قريت النور في كفك وطار الحلم ..!
يافاتنة لاسلم .. الحب حرب اشواق في ساحل فضا .. مافيه غير انتي وانا ..
وارواحنا .. تصعد على غيم السنين وتحلب الكون انتماااء ..!
يعني بساطة طير .. لارفرف جناحه والتوى يرسم بكف الغصن ترنيمة وداع ..
ولا ضياع يلمني مني سواك ..!
أدري أن الروح بوح .. والتئام الجرح حلم أغبر بليلة ماطرة حمَى حنين .. ولا سوالف بالسنين ..
كل ما بالأمر .. عمر .. يحاصر الباقي من اصناف العتاد .. الساكن بقلبي .. وينبت ياسمين ..!
ذابله كل الأماني .. قاحله كل الدروب .. في مساءات التعب .. لاقلب ينبض بي ..
ولا روحي معي .. كلي مساحة خنجر الغربه .. وكربه تنتظر بعض انشطااار ..!
يا أثير النبض .. ياصبح المطر .. لاجا يداعب شفة الأحلام في صدرك ..
ويرسمني جنون .. ولا يمون الا عيونك لابدت في كل درب تلمني مني ..
وتبدا رحلة اللا قيد .. في آخر سما .. وأعيش حرَ ..!
.(171)
.
.
.
حرَ في هذا الفضا والقيد راح
_________ أكتب أنفاسي .. تفاصيل وأنين
كل مازادت على دربي / جراح
_________ قالت الخطوة : على وين السنين
قلت مدري بس أشعر بارتياح
_________ لا لمحت الروح تـشربني حنين
استعير من الضيا صبح وفلاح
_________ وآخر الليلة .. يزيد الحـزن دين
وارتمي كلي عطش مااء وصباح
_________ زحمة عروقي حقول الصابرين
وين أودي وجه هالشوق المباح
_________ وين أطير ؟ وكل جنحاني بطين
غربتي ماتستفز إلا .. الرياح
_________ يشتعل جمري بها .. في كل حين
ياحبيب النبض ياروح الصباح
_________ هات كفك .. لعنبو كف السنين ...!
(172)
.
.
.
السنين أغصان .. وجروحي ورق ..!
_______ كل يوم يمرَ .. وجروحي تزيد
الربيع .. أعذب مواعيد الغرق
_______ والخريف أن مرَ / ماخلاَ وريد
هي مطر أوريح .. عندي مافرق
_______ الأهم آعيشها .. ماني وحـيد
الفراق / البعد / ترويض الأرق
_______ زحمة الإحساس بالحلم العنيد
كلها جتني على بال احترق
_______ تهدي عيوني وطن فيني بعيد ..!
(173)
.
.
.
بعيد .. بالفرقا غريب
_____ قريب بعروق الوله
لو شفت بانصافي لهيب
_____ ماغيرك أحدٍ شعلله
احياك واموتك حبيب
_____ ومابينهم لك سلسله
كتبت فيها اليانصيب
_____ وأحييت فيها سنبله
ياروح من نورك أغيب
_____ في هالفضا واتأمله
أكتب على فجره نحيب
_____ وبالليل خيل وصهلله
كني صويب ولا صويب
_____ مادام روحك مسأله
بآحلها قبل المغيب
_____ وآجيك غيمه من وله ..!
ليست هناك تعليقات:
إرسال تعليق