أوراق ممطرة الجزء الواحد والعشرون

(302)




.
.

.






نقيصه لو بكيتك طول عمري
ولكن باختصرك ببيت واحد :



لحالك يالغلا في وسط صدري
ولاغيرك وطن والله شاهد ..!




،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(303)






.
.

.






شاهد على جرح صوتي وانكساراتي
صبحٍ جفاني .. وانا وش باقيٍ مني


كني على غصن موتي عشت حسراتي
أقول ياليت .. او لو كنت .. لكني


أذكرك في كل صوت .. يمر بسكاتي
واذكرك في كل لحظة .. وانت متعني


انت الذي رحت فيَ .. وجيت لي آتي
وأنت الذي يوم .. ماخيبت بك ظني ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(304)






.
.

.





ظني وخاب ..!

وراحت نجوم الفرح ..

قبل الفرح ..

ينبت على شفاهي قصيد ..!



لاجديد ..!!

شمع ذاب

وخل غاب

ولابقى بالعيد عيد ..!




كنت أجهز لك قصايد من عروقي

كنت ذوقي

كنت آمال الفرح فيني ..

وفيني يبتعد ..

حلمي بعيد ..!




كنت أبكتب لك أنا

واشعل بك عذوق الضيا

وانسى العنا

وافرش لك بليلي وريد ..!





كنت

كنت

كنت

وللأسف ..!


راحت عناقيد الشجن

راح الوطن

ماباقي إلا دمعتين

وكلمتين :

ياعسى عمرك مديد ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(305)






.
.

.






مديد همَي .. والمدى حزن وافي
لاوين ياصوت التعب .. فيك بآآعيش ..؟



مرَ الإجابه ليل .. والصبح غافي
دام السؤال" أقدار" .. ماعاد به ليش ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(306)





.
.

.





ليش تصلبني على باب الجفا ..؟

ليش الجفا طعنة سواد ..؟



كيف السنين تهون في عين المدينة ..؟؟

كيف أعيد الوقت ؟؟

وعيونك عقارب من حنين

آضيع فيها

لازهاب ولا زناد ..!



لامتى وأنت ابتهالي ..؟؟

لامتى وأنا الغريب

اللي رصف بيت القلق

وتهادت بحضنه جياااد ..!



ليش

كيف

ولا متى

ماهي سؤال يمرني عابر

ولا هي من عيون الحرف تمطر بالودااد ..!



هذي مواجع

تسرق عيوني

من عيوني

وانا أبني مع طيفك

بقايا من حنين يلمني

يمكن ألاقي لي عتااااد ..!



يابعيد

وياقريب

لاتعيد لسيرة الما

لونك وذوقك وضوَك

وانتظاري والرماااد ..!



ابتعد عني بعييييد

ولاتجي

يكفي من الحزن مزن

يذوب في ذكراك

ويعيد السنابل للحصاد ..!



ابتعد ولاَ تعااال

لاتصير الدمعة اللي

ما رضت تنزل

ولا هي جفت بعين المودع للبلااااد ..!

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(307)






.
.

.






البلاد اللي بها نورك / عمار
يحتفل فيها .. المطر والياسمين


وماسواها / ليل ماحوله نهار
مابها فرحه / ولا قمرا وطين


يا أمير الشمس يانوض الحرار
يافطين البال .. من بعدك ثمين


طيفك .. يلف المداين والديار
في شراييني عذوقك والحنين


اشرب الغصة مطر كله شرار
من سحابة حلم مرمرها الأنين


يارفيع القدر .. يالول البحار
يارهيف الذنب كم باقي ونين


أسألك والجمر .. مل الإنتظار
أسألك والنار عطر الصابرين


لامتى وايديك هي روح النهار
لامتى والجرح سكين السنين ..!!



ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

(308)




.
.

.






السنين .. الله يانقش السنين ..!

أسامينا ..

أغانينا ..

أمانينا ..

نقشناها على روح الصباح ولا لقينا نور ..!

كتبنا الأزرق الهادي ..

وعلينا البيارق شوق ..

وخيل الذوق .. فرحانه ورويانه ..

وعاشت بالوفا الممطور ..!


كتبنا .. واحد اثنين وثلاثة

كتبنا .. " أحبك " في جدار العمر ..

لمينا المسافة بالعطا ..

كان الغياب حضور ..!


كان الجبل وادي ..

وكان الما على جناح المدينة ..

ينقش الأرواح باركان الفضا ..

ويسامره عصفور ..!


كان .. كل الكون مينا ..

والسحاب اللي سكنَا .. كان منَا ..

وكانت دموع الزمن لولو فرح منثور ..!


ليه كنا ..؟

ليه ماصرنا .. ؟

وفاس العمر يقطع مابقى ..

من جذع وافي مايخون البور ..!


ألا ياروح من حبك ..

قليله كلمة " أتألم " ..

ودمي في خريف النبض ..

يسهرني على غصة عنا ..

ويزفني مكسور ..!


انا ماودي اشرح لك ..

ولكن ودي الدمعة تمر وتسقي جروحي ..

وتسقي بالضلوع طيور ..!


تعبت اطلب دموع ولا يجيني غير خنجر ..

في ضفافه موت يتثنى ويتأنى ..

وانا ماعاد لي خاطر أمرر هالممات السور ..!


ألا ياشمعتي ..

ياملح عمري ..

مابقى في شهقتي دستور ..!


نويت ابعد على شانك ..

على شان العهود اللي رقت فيني ..

وتشقيني ..

وتنخر في عظامي ..

بالحنين الماطر المجبور ..!


دخيل الشمع ..

دخيل الدمع ..

ليه الأسامي ماتخون .. ؟

ليه الزمن ماهو حنون ..؟

ليه البشر دايم على باب العطا ماتحتفل وتثور ..!



ليه احتراقي .. له عطور ..؟

ليه انت أنا ..؟

ليه المطر صار القهر .. ؟

ليه الدقايق في حسابات الوفا ..

تحسب عليَ شهور ..!

يكفي ويكفي يا أنا ..

مالي على فرقاك حزمة من " قدر " ..

ولالي على معنى الغياب ..

إلا الصبر فوق الصبر يمكن يعيد النور ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(309)






.
.

.





النور تعريف الظلام / وفتنة الأقواس
والليل تأصيل الضيا .. باطراف كراسي



لو عشت عمرك يالصباح .. تقابل الحراس
بيموت بك نبض الحياه .. وتذبل انفاسي



ازرع من الأزرق مداك / و طيَر الاحساس
يمكن على همَ الدقايق .. تذكر احساسي



يعني ابكل اختصاري / هات بعض انفاس
لجل تمطر بي سماي .. ويمتلي كاسي ..!

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(310)






.
.

.





كاسي حزن

براد وقتي بارد الأجواء ..

وعروقي دفا ..!



يارفيف الوجد

كم باقي فصول ..

وزحمة الأنواء

شوق وماطفا ..!



لاتساؤل

لاحلول

والمدى أزرق

وباقي في تفاصيل الحنين

عيون .. واحباب ..ووفا ..!



لاتعلمني عليك ..

وتعتذر ..!

ماطلبت العذر للفرقا

وسيل اوجاعي اكبر

من حروف تمرني

مثل المسافر للجفا ..!



انت اكبر ..

وأنت اجمل ..

وأنت اعذب ..

من حروف السنين اللي مضت

تكتب مفاصل غصتي

غبني ..

وتسألني كفى ..!



لاعاد تسال

لاتجي

لاتوقد اطراف المدينة باشتعالي

وانت تدري

كم لـ صدري

من أنين

ومن عذاب

يزفني لـ الغربه اللي بابها فيني

وفيها نبضي المجنون عمره ما غفا ..!



آآه أكبر من ظلام

وآآآه أكبر من جنون

وآآآآآه ماتشفي ولا تدفي

بليل يضمني لعيونه الغبرا

وباحساسي ضفا ..!




ليل ماعمره صفا ..!

لاولا قطرة مطر

مرت عيونه

قبل يسالني عليك

ويبتدي سيله

مواويله

وحزنه

رغبته

موته

أنينه

غصته

وانته على صدر الغيوم

اجمل فضا

واجمل سحاب يلمني

واحساس مايوم اختفا ..!

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(311)





.
.

.





اختفا النسيان في مينا الصبر
والسفن بالذكريات محمله


الحنين الموج وعيونك بحر
والرياح جنون روح وبلبله


طفلك الغالي توطاه القهر
وحضنك الأجمل مدى ما أنبله


لاتسمين المطر لعبة قدر
ولاتسمين السحاب المهزله


المطر نبض المشاعل والسهر
المطر بركان حب اتأمله


شوفي القطرات كم فيها نهر
واحسبي نبض الحياه ومجمله


بابك الإحسان وعذوقك زهر
والجمال انتي فضاه وأوله


العذر ماعاد يكفيني عذر
والخطا كل الخطاوي مهمله ..!


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(312)







.
.

.






مهمله .. دمعة الرحال عند الغروب
مذنبه .. كل خطوه في طريق الغياب



المواجع / مدينة ظلم .. زحمة هبوب
كل غصنٍ سقيته عدل / يكبر عذاب



ماحصدت الجروح الا بنبض القلوب
ولا عمرت الليالي غير حزن الكتاب



سمني ماتشاء .. النبض ماهو ذنوب
يكفي اني زرعت الحب بين الهضاب



ويكفي اني جبل من عاليات الجنوب
ويكفي اني نحتَ الصخر بيد السحاب



خذ من الدمع طرس ومن عيوني دروب
واشبع الليل ماااء ولا تملَ العتاااب



الزمن مايصب اللين .. وقت الحروب
والمدى مايجف .. الا بـ ماء السراب



خذ من اعداك حكمه واعترف بالخطوب
وخذ من احبابك البسمه ولين الجناب



خذ حروفي نصاب ولا تصيراللعوب
وخذ مداين ورود .. ولا تعلَ الخطاب



غربتي خنجري / والليل مهما يتوب
ذنبه أني قريته .. واعترف بالغراب



لويطيَر جنونه .. صرت كلي شبوب
بندق الصبح ثارت .. ما عليها حساب



ياوسيع المدارك .. خذ عيوني دروب
وخذ من الرحلة القشرا عيون السحاب ..!


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(313)






.
.

.





السحاب .. اللي نثرته في فضاك
مايلمَ الجرح ... واوراق الأنين



ممطرة دنياي وأضمى في رضاك
ليه غيمك .. مايظل العابرين ؟؟



أشتهيك / وأشتهي قطرة سماك
لو سماك تقول .. ماباقي سنين



ياعظيم الذنب لو تعرف غلاك
ماحرمت الجمر من ماء الحنين



حسبك اني ما ضميت الا هواك
وحسبي انك ماتحب الا الثمين



هات سلطان الجنون بـ مبتداك
وهاك روضة تحتفل بالياسمين



يعني ابدا بي وبوصل لك معاك
يعني اقرا بي خطوط الممطرين



العقارب موت واحيا بك هلاك
هات كفك نكسر الساعه بلين



ياعظيم الذنب .. لو تعرف غلاك
كان ذاب الثلج بـ يدين السنين ..!