(100)
.
.
.
الغايبيـن و رحلـة الـحـرف و الــروح
( 100 ) تعب مدري تفاصيل شوقـي
الصبـح جـرح وباقـي الليـل مـجـروح
وفـي كـل يـوم رمـاح يـا كـثـر عـوقـي
بكـتـب قصـيـدي ســمَ وآعــلَ وآنــوح
لــو مــا كتبـتـه طــاح هالـكـون فـوقـي
وش حيـلـة الـمـا لاتسـامـى بــلا فــوح
وش حيلتـي وآنـا الضمـا فـي عروقـي
هنيـت روحـي بالسفـر داخــل الـبـوح
وملـيـت روح مسـافـرة فــي طـروقـي
نسـأل علينـا ويـن ؟ والعـمـر بـيـروح
دورت فيـنـي واحـتـرق بــي خـفـوقـي
فــاح الـرمـاد بخـاطـر كـتـاب مفـتـوح
والريـح سـالـت قـبـل مـحـيـا شـروقـي
(100) تعب مدري وله تسكن الروح
وآنـا لحالـي مـرمـر البـعـد شـوقـي ..!
(101)
/
\
/
\
شوقي وتفاحك ..
سكينهم بيدك ..
وغيمة على الشباك ..
تسأل وتتمنى
همسك وتغريدك ..!
وأحيا بترديدك
لاوين حنا وين
والغايبين اثنين
عطرك مع جيدك ..!
ياهمسة عيوني
مليت تجريدك
وينك تعبت آقول
فينا منافينا
ودي ألم الكون
وأسهر مع قيدك ..!
(102)
.
.
.
.
.
.
(103)
.
.
.
أسامينا ..!
كتبناها بـ صباح أزرق ..
ولا ورَق ..!
من كفوف الشجر طارت أماني وابتعد عصفور ..!
سألني ..
لا متى هذي السما فيها شوارعنا ..
وفيها نحتفل وندور ..!
سألني ..
ياعبدالله ..
متى هذي العيون تمون ..!
متى عيوني على باب السحاب تعيد موال الأماني تحرق الدستور ..!
سألني ..
سألني ..
سكتَ ..!
دقيقة ثانية مدري ..!
ولكن الثواني في حسابات السما ياصاحبي بشهور ..!
ومااال الليل ..
وصبَ الصمت ملحه واحتياله والجروح تثور ..!
أيا روح النهار
وبسمة التاريخ في عيني ..
تعبت أسقي مواويل الغلا فنجال صبر وتمتمة مقهور ..!
ندور ندور ..
ولا ندري متى حنَا ظلمنا بعضنا
أو هو ظلمنا هـ الزمن
واعطى مفاتيح الهنا للريح
وحنَا نطيح
بدمعة شوق
ودوامه من النبض العفيف المترف المجبور ..!
متى ياطير ؟
أجاوب هالتساؤل واجمع المنثور ..!
ألا ياطير ..
سؤالك يحرق الباقي .. من اوراقي
واصير بهـ السما قطرة مطر
مامرَت عيونه ولا هي اللي سقت هالبور ..!
أيا طيري ..
دريت ولا درى غيري
دريت ان الغريب يعيش عمره بين أوراقه
ولا هو اللي نسى بعضه
وبعضه في ثنايا صبحها مبتور ..!
أيا طيري ..
دخيلك لاتساءل كيف نتحنا ولَه
ونموت مثل الشمع
ندفن دمع
ونسافر على بيض النوايا والحنايا نور ..!
(104)
.
.
.
نور شوقي داخل اوراقي دليل
__________ وأنتي أعرف من أكون ومن أنا
كل هذا الكون بعيوني يميل
___________ واعتدل بك لاطرا شـوقي عنا
مادريت أن العشق كفه بخيل
___________ لين جاورت الشقا صمت وفنا
أسرقيني من عناقيد المسيل
___________ واحضـنيني بين طـيات الهنا
كل مابيدك خيول ابلا صهيل
___________ وكل مابيدي عطيته يا أنا ..........!
(105)
.
.
.
أنا .. !
أنا زحمة غياب وصدري المينا مع الأوطان
_____________ أنا كل انكسار النور.. مابيني و مابيني
أنا همس المطر واكثر أنا أنته بلا عنوان
_____________ انا صمت السحاب وكل ما تمطر تبكيني
أنا كلك وكل الكون بـ يدك لوَن الألوان
_____________ أنا روح السما وأنته صباحاتي وتكويني
(106)
.
.
.
تكويني الغربة ويكويني الشوق
__________ ياغايبه عني تعبت أحتملني ...!
(107)
.
.
.
احتملني ..
واحتمل موت الثواني في عروقي ..
وأنت وين ..؟
لاعطيت الما حقوق ......
..... ولا شربت من الأنين ..!
ولا سقيت من العطش بعضي
وانا كلي
مسافة جرح مصلوبه على باب السنين ..!
يخرب بيوتك يالحنين ..!
يخرب بيوتك يالحنين ..!
يخرب بيوتك يالحنين ..!
(108)
.
.
.
الحنين الما وذكراك اللهب
_________ واشتياقي ليل وعيونك صباح
البحر ظالم وصدري للتعب
_________ والمواني حلم ودروبي جراح
الأصابع باب والريح الغضب
_________ والأماني طير ورضاك الجناح
المطر ماهو حروف وتنكتب
_________ المطر روحه تـمادت بالكفاح
برق ورعوده تزم ولا عجب
_________ ســيل جارف ماتوقفه الرياح
في عيونك هالصباح المنتصب
_________ لا تقـولين العـمر ماراح راح
المحبة شمس روح بلا سبب
_________ ياصباح الخير ياخير الصباح .........!
(109)
.
.
.
الصباح بدون عطرك وش يكون
_________ تمتمة مجنون والزحمة سما..
دمعتي جفت وباضلاعي مزون
_________ تمطر اوراقي وتسألني لما ..؟
ليه تتمادى ولَه غي و شجون
_________ ليه تحلم ..حلم ميت .. ربما ..!
قلت للحيرة ولـ اشباه الظنون
_________ حلمي أكبر من مسافة ربـ مااا
حلمي أدفا في زمن كله طعون
_________ دام برد العمر بـ عـيوني عما
كم نعيش وكم نموت بهالدخون
_________ كم شربنا صبر واعيتنا الدما؟
كم تمايلنا ظلام بــ هالعيون
_________ وكم تصفحنا مواعيد الظما..؟
جف كوني في غيابك ياحنون
_________ وما تجف الروح وطموحي نما
بنتظر نورك على أرض الجنون
_________ واطفي الليل المعتق لـ ارتما
انت تدري انك بـ هالكون كون
_________ وانت تدري كيف صار الـ أنت مااااا ....!
(110)
.
.
.
أنت ماااء
وأنت نااار
أنت فوح الغربة القشرا على كف النهار ..!
أنت لجلك سمَوا العشاق وقفتهم على باب الأماني ( إنتظار ) ..!
أنت صوت بدون صوت ..
أنت صمت العازفين الذابلين بقطعة الثلج الحزينة وسط نااار ..!
أنت موت الموت ..
وغيابك غرق عاشق على أمره .. ويتنفس مداك الأزرق الساحر ويتلحف بحار ..!
أنت فوضى شمس ..
وحضورك يرتب مابقى من ليل متعثر بتلويع الستاير .. والستاير غافية فيني ولَه ... حمَى حصار ..!
يا أمير الناس ..
ياروحي
تعبت
وفاح
من عيني
أمل
مدري
ألم
مدري
غرابة موت
أو
زحمة سفر بين الغبار ...!
(110)
.
.
.
الغبار اللي مع الخطوة سرى
_____________ يسألك وين المطر وين الوعود ؟
كلما ماناظرت بالدنيا ورى
______________ قلت في نفسي تعبت من الصمود
أيه أحبك كثر ما ليلي ذرى
______________ همسك المجنون بـعيون الوجود
المـطر عمره تبلل بـ الثرى
_______________ يوم صـدري منك مـتبلل ورود
ماطرا غيرك بقلبي ماطرا
_______________ أنتي أعظم من تفاصيل الوجود
لو تغيبين العمر عمري قرا
_______________ الغياب يغيب لو طال الصدود ..!
(111)
.
.
.
الصدود ..!
حكاية أطراف المدى لاغبت فيك ..!
يعني كل الوقت
يسبقني إليك ..!
يعني كل الكون
متلهف يجيك ..!
باختصار
أنت أنا ..
وكل ما أدوَر عليَ آضيع فيك ..!
باختصار أكثر ..
أ
ح
ب
ك
موت موت ... وكل مافيني يبيك ..!
باختصار أكثر وأكثر
وش تبي بعد اعترافي ..؟
ياتعااااال آعيش بك
أو
روح في دنياك ..
بس تكفى تطمني عليك ......!
(112)
.
.
.
عليك أسم الله عليك ..
جيتي بوقتك ..
ورحتي بليا وقت ..
وآنا في مواويل الأمل ألمس يديك ..!
تدرين وش كبرك بروحي ..
وتعرفين أنك أنا
وتشعرين بكل ما أبني من أحلام الصبا ..
.. والعمر يهدمني ويتمايل يبيك ..!
صدقيني
كل ماشفتي أقل من الحقيقة
والحقايق كلها أصغر من اللي في ثنايا الروح ..
... يتحرى يجيك ..!
صدقيني ..
مابقى باقي من عروقي .. رهين الصمت
كلهم في حفل موووت
يبادلون الهمَ فنجال الأسى ..
... والكل منهم يرتجيك ..!
.
.
.
(113)
.
.
.
يرتجيك الصبر وتموت الثواني
يحتريك الحلم .. ويزف الحنين
لو سرقت من المدينة ما أعاني
مابقى لـ الناس صوت ولا أنين
يسرقوني دام أنا كلي مواني ..
وابتسم لـ الما ويتهامل حزين..
يفرحون بقطرة الما من لساني..
يكتبون الغي والصدر الأمين..
هي كذا ياصغرها : دنيا أماني..
تستفز الليل .. وتشب الثمين..
ماعلى الدنيا ملامه لو حداني..
شوقي الأغبر.. وترتيل الونين..
بازرع الحنطة على غفلة زماني..
والحصاد الغير والزحمة سنين ..
ماخبرت أني أجي بالعمر ثاني..
ولاخبرت الوحل ينبت ياسمين..
دمعة الما تكفر بغي السواني..
ودمعة التاريخ .. مافلت جبين..
الوجيه السود مازاحت مكاني..
دام حلمي ظل والأغصان تين..
علميهم ياعيوني من شراني..
علميهم كيف متنا صابرين..
السما مفتاح والزحمة أغاني..
والبقا أرواح واللحن الحنين..
(114)
.
.
.
الحنين ..!
انحسار الوجد ..
خلف ستارتين من الألم ..
واقف وراها بعض حلم وبعض تين ..!
الحنين ..!
إرتعاش عروق ..
قبل يفوق ياس ..
يبدل الحاله بسين يجر سين ..!
الحنين ..!
لخبطة أنفاس ..
في لحظة تسامي..
بين ورد الروح واشواك الغيوم ..
بـ صدر بستان الحزين ..!
الحنين ..!
غصة الأشواق في كاس الأمل ..
عند إنثيال الذكريات الصامدة في وسط عين ..!
الحنين ..!
لعنة الحب الوحيدة ..
لاذكرت أنك وحيد ..
ودمعة الشوق .. انتظارك في وجيه العابرين ..!
الحنين ..!
اختناق الدمع بين حزام غربة ..
يربط الأحلام بـ ايدينه ..
وعينك واقفة تلمح مشاوير السنين ..!
الحنين ..!
إنحسار وإرتعاش ولخبطة ..
غصة ولعنة واختناق ...
ولملمة أشلاء في ركن السما ..
لامن تساءل دفتر الأضلاع ..
ليه تموت بدري .. ؟
ليه بـ اشواقك تعيش ..
ولـ جل ميييين ..!
(115)
.
.
.
مين يسهر مين بعيون الجفاف
_________ من يعيش الموت بكفوف المطر
الضيا يســأل وعمره مايخاف
_________ من ظلام الظلم أو طول السفر
السحاب اللي يمر .. بلا ضفاف
_________ ماملا عيني .. ولا عين العمر
أنتي الباقي ولا باقي اعتراف
_________ احضنيني قبل ماموت انتظر ..!
.(116)
.
.
.
أنتظر موتي ولاحولي شموع
__________ العروق الشمع والضوَ الرحيل
كل ليله اشعر بطعم الخضوع
__________ وانحني للدمع واطراف المسيل
عين صدري خاينه كل الضلوع
__________ تهتف بـ موتي صهيل بـلا صهيل
غصة المخنوق موت بلا جموع
__________ لا وداع .. ولا حـياه .. ولا دليل
لامعاني .. لاسمو .. ولا رجوع
__________ لا أماني .. لا ممات .. ولاسبيل
شققوا ثوبي وظهري له طبوع
__________ مايساومهم على ثوب العليل
انشطار الأنشطار اصعب دموع
__________ مافرق بالموت تجريح القتيل
يكفي ان الحال يشبه للشموع
__________ يكفي ان الشمع معناه الرحيل
(117)
.
.
.
الرحيل ..
رحلة الما بين عين النبض والموت البخيل ..
الرحيل ..
تمتمة أنفاس بين اركان صالات الغياب وبين تعريف العليل ..
الرحيل ..
وادي الغربة على حرَ اشتياقه مايسيل ..
الرحيل..
هو أنا بـ كل اختياري
وانت ياروحي الدليل ..!
.
.
.
(118)
.
.
.
الدليل اني أعيش ولا أعيش
_______ انشطاري بين جمر الأسئله
المطر مجنون بس مابلَ ريش
_______ وادي اشواقي سيول محوله
طاحنتني معركه من غير جيش
_______ والهزيمه في عروق تزمله
يحتمي بي يوم رمحه مايطيش
_______ واحتمي به والغياب يموله
وانثني غربه وليش تجرَ ليش
_______ والعمر مايوم وقف يسأله
من تمادى من يموت ومن يعيش
_______ من تثنى بين جمر الأسئله
(120)
.
.
.
الأسئلة .. طعنة المجروح
______ والأجوبة .. حلم بـ غيابك
تعالي أهديك شمس البوح
______ واغزل لك الغيم باهدابك
لك السما وانثيال الروح
______ لك المسافات تهنا بك
قصرك تعلا وانا مفضوح
______ عليت حلمي من اسبابك
البحر لك وانعتاق الضوح
______ والبر .. فرحان بزهابك
صدرك مدينة أمل وطموح
______ آموت وأذوب باحزابك
مشيتك فيها ضيا مشروخ
______ يامن يلمَه عـن ثـيابك
ياساحرة بابك المفتوح
______ يابارعة وينها ابوابك
طيري وتر صوتك المبحوح
______ والأغنية حلم باسرابك
طعنتك مافارقت مذبوح
______ والدمع مافارق احبابك
تعالي اليوم قبل الروح
______ ماتلبس غياب بغيابك
ليست هناك تعليقات:
إرسال تعليق