(314)
.
.
.
السنين
فوضى شموع
بعثرة ساعة ..
ودمع ..
يعيش ميت .. مثل موت الحالمين ..!
السنين
لوحةالخالق
بألوان امتحانه ..
واعتماد الناجحين ..!
السنين
حمَى السحاب
جمرة غياب
ربما تمطر وجع
أو ربما نسأل إجابات الفرح
وينك ..
ووين شموخ دمعه ..
تختنق ..
ماشافها غيرك ..
ولا غيرك يعيش الجمر ..
بكفوف الحنين ..!
السنين
عطر جافي
مايفوح لكل عابر
أو غريب يمر هالدنيا
مثل طيرٍ تولاه الجفاف
وراح ينشد للسحاب
أغلا الأماني
وارتعاشه والأنين ..!
السنين
همهة سكين
في صدر الليالي
" تجرح الحاضر
وتخدش الآمال
وتعيد الجروح اليانعة
زهرة على باب الشقا "
ماعمرها تهدا ولا لحظه تلين ..!
السنين
واطية ..
متساوية بالموت
في عرف الشجاع
اللي كسى وقته
جبال من الصبر
واعطى عيونه ..
لـ العيون اللي يحب
ولا سأل دنياه
وش معنى عطا
دامه عطا روحه
ولا يسأل لمين ...!
السنين
لمعة الاضواء
جبن الشارع الخلفي
ممات الورد
معنى البرد
في ضلع الطفوله
في ضلوع الصامتين ..!
السنين
آآآه ياجور السنين
كلها تعريف لـ الغربة
ونقطة بالفراغ اللي ملا عين البشر
حمَى عطش
وعيونهم فيها سحاب العطف
وحصان الأماني ..
يسرج أنفاسه
ويتمادى ونين ..!
السنين
لثغة الماضي
وليل الحاضر
وهمَ الجديد
وكل مايمكن يكون
ألا
شموخي
وانثيال الما على روحي وغصن الياسمين ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(315)
.
.
.
الياسمين / وضي روحك / وطاريك
رحلة مطر / ما بين روحي وروحي
إما تعااالي اليوم / واسقي أراضيك
ولاَ هديتك .. مابقى من جروحي
الى متى .. والسيل ماءه يراضيك
إلى متى وانتي .. حكاية طموحي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(316)
.
.
.
طموحي صبح / وطموح المدينه مالقى منزال
وحلمي .. ( شمعةٍ بعروق ليلي تشبه الغيمه ..
.. تصب الضو بعروق الحزن / يتفاءل الخيال
يصير الدرب فوق الإحتمال / وتعطي القيمه )
سؤالي لا متى هذا المطر مايسقي الرحال ؟؟
وصخب الأنتظار يعيد .. لـ التاريخ تقسيمه
ألا يافتنة عيوني .. ألا ياموتي الهمال
تعبت أبني من امالي / جفافٍ يشبه الديمه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(317)
.
.
.
الديمه اللي زلزلت / خاطر الروح
بين الحنايا .. تزرع غصون كادي
ماهي مطر / لكن لها صوت مبحوح
أوتار شحت بالندا .. وانت غادي
لاوين أبهدي هالمدى / عطر وجروح
لاوين بآعيشك .. وموتي ينادي
واللي خلق من نظرتك .. سحر وجموح
ماشوف غيرك سال .. في كل وادي
هذي شرايين الوله ... تحكي النوح
وهذي خيوط الغبن .. لفت ايادي
زحمة قيود .. تعذب الليل وتروح
ولاجا الصباح أشوف عينك بلادي
وحدك حضنت الما وانا اعاشر طموح
ووحدي بكيت الحلم / في ركن هادي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(318)
.
.
.
هادي رصيف الدمع / والشمع حالي
والبحر ثاير .. والعطا ملح غيه
لاجيت رحت / ولا نويت ارتحالي
تجي مواعيدك .. سحابه عصيه
فيها عزا للريح .. والغصن خالي
عصفورها طاير .. ولا فيه زيه
ياسيد المعنى .. وصولك دلالي
وفنجال شمسك .. مايخاويه فيّه
أقرا عليه البال / واحضن سؤالي
وانت الإجابه في يدك / مهمهيه
لو ترسم الأزرق ... بلوحة خيالي
فينا جنون المااء / وأرواح حيه
صبح انتظارك ملّ كثرة عيالي
اولادي الساعات .. صبح وعشيه
أهديهم جروحي .. وحمّى جدالي
واضرب عصاي بأرضك المخمليه
وارجع .. مدينه خاليه بـ انعزالي
واقرا عليّ بكل ليله .. أسيه
ياصبح روحي / هات بعضي لحالي
وخذ مني اجزاءك .. وحلّ القضية ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(319)
.
.
.
القضية ..
كلها سكين ليل
وانت تفاح القصيد
والخطايا ..
روح في آخر مدار
تعيد لي موتي الجليل ..!
هي خطايا أو دليل ..؟
أو غصون من الوله
تحكي مداك الأجمل
الأكمل
وانا حرفك
وظرفك
وانطلاق الما مع أنفاس تكثر بالقليل ..!
يابعيد وياقريب
هات حلَ
وهات روحي
وابتعد وحدك
وانا بغفل عن اوطانك ..
.. واجيك
ربما القاك صحرا
تنتظر كلي يسيل ..!
لاتميل
ولا تقول ان المطر قصة غروب
المطر نبض الحياة
واصعب الموت االبطيء
لابدا ماضيك يسأل
عن مطر غافي
ودافي
والإجابة في ذرى قطرة خليل ..!
ياحبيب النور
ياضي العروق
اللي بها قصرك
وخدامك خلايا من ورود
تعيش بك
وتموت بك
وانت الوحيد اللي لها شمس وظليل ..!
ليه أنا وانت العنا
ليه نتحاور فنا
ليه نشرب من كفوف الذل
واحنا بالشموخ شراعنا يصهل صهيل..!
خذ من احضاني وطن
وآخذك ليّ
تعيدني مني
وتقرا بي تعاويذ الفرح
يمكن على جال النهر
ساعة جروحي
توقف بلحظة حنين
ونبتدي
نهدي ..
زمان الموت معنى المستحيل ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(320)
.
.
.
المستحيل بكل تعويذة حقيقة مايلمّ الحلم .. مايهدي جنود الصبر .. غير القبر .. ودروع السنين أحلام في وادي غشاه الخنجر المبري جفاف .. ولا ضفاف تعيد بعض المااء لغصون الحنايا في لهيب البرد وارتال الجبال .. رجال تتهيّل شموخ ودمع من كوكب حنين يعيدها أطفال تترجّا ابتسامة أو هدية مرّت بعين الحياة ولا لقت حلم وغنا .. يعني فنا يسرق من أنفاس الغريب العود الأزرق والوطن وانتي لحالك فيه ماغيرك عطاه الموت والدنيا تذّل .. الكل ويعيش الصبا ميت على حافر سحابه ذايبه شوق وألم .. مثل القلم لامرمّر الأبيض وفا واختال بعيون الجفاف ولوعته أنثى مطر .. هيبة قدر ولاّ سحابة تمطر الدنيا عفاف ولا بقى منها عقيق إلا لمحته في مساء الريح وعروق الغياب تلمّني مني ظلام وكل مافيها صباح ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(321)
.
.
.
صباح الموعد اللّي لمّني .. وارتاحت احضانه
صباح الروح واحساس القصيد ورغبة احضاني
هو موعد بلا موعد ... ولكن فاحت اركانه
على اطراف السما حسيت فيه وصار عنواني
شربت الما بدون الما .. رويت بزحمة اوطانه
ولميت المطر بعيون قلب / وسال باوطاني
غدير الروح كان اعذب / وكان " الصمت " فستانه
قريته قبل ما أقرا .. الكلام اللي على شاني
حقيقة حلم / ماهي سلم / حروب بنكهة لسانه
ولكن "كل ما أملك" .. لـ حلم يعيش وجداني
صباح الحلم / يا روح القصيد وهيل فنجانه
صباح احساس عشته قبل ما أنساك بـ احضاني ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(322)
.
.
.
أحضاني النوتة / وقربك مواويل
والبعد صمت احضان والصمت فالي
تدري جموح الخيل / ماروّض الخيل
مثل الفقير .. أغناه / عزّ الليالي
خذني على بال الوفا / واركز الليل
خلّ الصباح يعيش .. فوق احتمالي
تدري مكانك / داخل السيل / ياسيل
نبضي شعوبك .. وانت للروح والي
تعال / هات المااء / وتذوّق الهيل
وش هي حياة الناس / والجوف خالي ؟؟
وش هو المطر لاجفّ نبض المراسيل ؟؟
مـ ابغى الجواب وطعنتي من سؤالي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(323)
.
.
.
سؤالي / ماسألني / ليه أنا اسأل
لأنه يدري الأسفار / روحي
رحايل فرحتي / ماظن تكمل
وزاد الرحلة / غيابك وبوحي
تفاصيل الوّله ثوبي / ولا أجمل
من ثيابٍ .. بها ذكرك يفوحي
عطور الحال / من طرياك تخجل
وأشم الذاكرة .. وأنفض جروحي
وأقول ظروفنا / والوقت مهمل
وعذري يسحبك .. لـ ديار نوحي
هي الدنيا كذا .. والصعب الأمثل
نعيش أغراب / روحك وسط روحي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(324)
.
.
.
روحي فيك .. يا معنى الأمل / ياقيمة اللي راح
وباقي لي بعض فوضى .. تزم الجرح باهدابي
أشوف الناس ماهي ناس / دونك ماعرفت ارتاح
ولا حسيت وش معنى الحياه / بزحمة أصحابي
وحيد من الفرح / مالي من الأحباب غير جراح
أتصفح / مواجع من مطر .. وآبلل ثيابي
غريب الما / يذوق الما .. "خيال" بحلمه الفضاح
وغيمة خاطره .. حزن الفقيد الموجع الرابي ...
... على حدب الضلوع أرسى مراكب مالها مفتاح
وضاع بزحمة الغربة .. وضعت بكامل اسرابي
طيور بلا فضا .. حطّت على بالي تقول / اشباح
وصرت أغصان في قصر الخريف / ودمعتي بابي
ألا ياروح من حبك ... ألا يا صبحي اللي طاح
أنت اللي سرقت الناس / وانت الناس واحبابي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(325)
.
.
.
أحبابي الغيّاب / والحاضر الشوق
إما / قتلت الشوق .. وإلا / قتلني
أحس ماعنده .. ولا شي مـ الذوق
دايم يغالبني .. اذا ذاب جفني
واشوفهم فيني سما رعد و بروق
والذاكرة تمطر .. وبردي نثرني
شرفة غلاهم / ليل ماولع شروق
وباب الضيا قفله .. غلبه و غلبني
آحس فيه النبض مالي به عروق
لكنّ / صمته بالتغلي .. سلبني
حلمه كبير وحلمي أصعد معه فوق
ونعيش في غيمة وفا / تـنتصفني
نكسر أساور عمرنا / نبني الطوق
من ماء روح .. وكل ماطاح نبني
احلام قشرا / كل ماقلت بـ تروق
شبّ الحنين / وسيرة الجمر حضني
وآعيد به موال الأشياء .. وآفوق
واهدي جروحي لـ الأمل و التمني
العمر دمعة .. مارضت تطلع لـ فوق
لا طاحت بدربي / ولا ارتحت مني ..!
ليست هناك تعليقات:
إرسال تعليق