(440)
.
.
.
أحتويك بكل مافيني حنان
وارفض اني أحتويك بكلمتي
طبعي أوفي للغريب وللمكان
كيف عاد آخون رغبة نظرتي
أنتي الباقي من عيون الزمان
لاقسى وقتي وضاقت دنيتي
الغريب أن عاش ماحوله أمان
عاش موته وأرتوى من غربتي
فارس احضاني عجز يلقى حصان
وانتي حصان العروق ومهرتي
المدى واقف على ثغرك رهان
كم كسبت وكم خسرت بوحدتي
يكفي أني عشت بك كل امتحان
ولا رسبت إلا بشوقي / لهفتي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(441)
.
.
.
لهفتي موال روح
وكل تغريبي ظلام
وانتي انتي
بين حد النور في رمش الثواني
حلم واوطان وغمام ..!
لاجديد من الهيام ..
كل مايمكن هديته
واهتديت احساس غربه
في يديني
ينثر الباقي من عيون الكلام ..!
والمسافه جمر
مدري عمر
لكن عطرها مافارق أقدامي
ولا فارق عبير انفاس
تتحرا عيونك
تكتب بعين المدى :
لحظة سلام ..!
يا أميره من ضياء
لاعزاء
وكل مافينا : منافينا
وصمت الليل
لابعثر خطاوينا
وعشنا مالنا أسماء
دام الماااء تغريب وملاااام ..!
علميني وش يكون ؟
ومن نكون ؟؟
وفي عروق الحال
ملينا جروح الذات
صوت أموات
دام الذنب .. كل الذنب
روح تعيش روح
وتبتدي حمّى الغرام ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(442)
.
.
.
الغرام الجمر .. وعيونك تمون
وكل ماهانت ..! يزيد الجمر جمر
ليه نحطب روح .. ماتقوى تخون ؟
وليه نتهادي ولّه ؟ ونموت صبر ؟
أسئلة / تحيا على موت الظنون
وأسئلة / بتموت فينا بعد عمر ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(443)
.
.
.
عمر ولا اثنين ..! ماتفرق معاي
لو أعيش الفين عمر : أشتاق لك
لا تساءل .. وأنت ترنيمة رضاي
وانت تدري .. كم أنا محتاج لك ..!
في صباحي / في منامي / في مساي
عايش بصدري / وغصب آآحن لك
الخطا بالحزن .. لاماهو خطاي
الخطا : كيف الزمن ما دلـلك
والغياب اللي تمادى في عناي
جيت له عاني .. وغبت اتأملك
ليتك تشوف المعاني في سماي
كيف تمطر بك تعب .. واتحملك ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(444)
.
.
.
أتحملك فيني غياب .. وعنا صبر
ولا عاد فيني أحتمل موت فرقاك
ياطير بغيابك يصير المسا صدر
وآطير وجناحي يرفرف بذكراك
وحدي أغيب ولاتمنيت لك عذر
خل الغريب يغيب مافاز برضاك
دنيا تصافق بي وانا حيلتي صفر
أحيان في يمناك وأحيان يسراك
ياطير لاتسأل عن الليل والجمر
غصة غيابك مالها نفس تنساك ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(445)
.
.
.
تنساك كل الناس لكن أنا : لا
تبقى معي لين ارتوي من ترابي
انت الوحيد اللي ملاني ويملا
عين السنين اللي بها ضاق بابي
ماغيرك انسان على الدوم يغلا
ولاغيرك احدن لمني من غيابي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(446)
.
.
.
غيابي فيك حاورني على حزني وقلت آآغيب
توقعت أقدر أبوحك سما ،، وأمطر على مابي
لقيت أن السما جفت حزينه طالها التغريب
وقفيت أحمل اوزار الحنين وطارت أسرابي
لحالك عشت أدوزن لك غرامٍ ماوطاه العيب
ولك وحدك قريت الما : حياه وضاعت أسبابي
لك النور بكفوف الليل يمشي والخطاوي طيب
ولك روح المطر ياللي .. نحرت الغيم باهدابي ..!!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(447)
.
.
.
أهدابي مسا والنور يسأل لامتى بتغيب
وأنا في حيرة أنصاف الحلول آلملم شتاتي
غريبه هالديار اللي تسلمني لباب الغيب
وانا مابين تجريح الغمام آساير اوقاتي
مطر ويموت باحضان الغريب ويبتدي تعذيب
متى بتحن ياوبل السما وتشوف حسراتي
أحبك والذي صور غرامك مثل غفوة ذيب
إلا منه صحى شب السنين وعاث بآهاتي
دخيل الليل ماباقي سما تستمطر الترتيب
وأنا فوضى من احساس الجفاف تعيش بشفاتي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(448)
.
.
.
شفاتي تنبت أوراق الصبر والدمع باعماقي
وتلويع الحنين يزيد جمري وابتدي الترحال
إلا مني قريت جنون عقلي .. مت بفراقي
وإلا مني تذوقت اغتيالي قلت : ويل الحال
أحبك كثر ماحسيت روحي تمطر اشواقي
وأحبك كثر ماالغيمة تصيح وينتخي همال
أنا وحدي هنا أبني من احلام الوفا اشراقي
وانا حزني هنا يبني معي : قصة تعب رجال ..!!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(449)
.
.
.
رجال ودموع التعب حاتميه
ماهمني وش قالوا الناس عني
دمعة ألم فيها صباح وأسيه
وفيها مساءات العنا تحتويني
طيرت صبري عالشقا والأذيه
ولقيت صبري ميتٍ في يديني
وش عاد لي من حلم قصدي شظيه
وش عاد ياحلمٍ تغافل سنيني
غصن التجاهل مات قبل الخطيه
والطير مات ومات فيني حنيني
العمر دمعة روح والدمع ليه
ماباقي بروحي عطش يرتويني
أموت ضامي روح بالفين كيه
ولا يموت العزّ في راحتيني ..!
ليست هناك تعليقات:
إرسال تعليق