أوراق ممطرة الجزء التاسع

(141)




.
.

.




عروقي فيَ ..

وانتي في سما هالروح

جموح العشق

وأنواء الحنين المترف الممطر شموخ وغيَ ..!


لأنك كل ماحولي

وكلك ضي ..!

سلبت الصبر قوته

.. واحتميت بصبحك الابيض

وناولت المسا بعض السحاب ...

... وصاااح فيني شي ..!




سجنته ماسجنته

بس لميته نهار .. وصار

بضلوع الليالي

فارس المعنى .. أمير النبض .. سيد الحيَ ..!





حزين لحاله بحاله ..

صدى صمته كفاف وميَ ..

سكن صدري ولملمني

عرفت أن الممات أشهى ...

ولا أبهى ..

من عيونك إذا جفنك ..

همَس للريح

دللني

بترتيب الممات الحيَ ..!



(142)





.
.

.







الحي طيفك والمدى روح مع روح
__________ والموت كل الموت لاغبت عني


انت الوحيد اللي له البال مفتوح
__________ وانت الوحيد اللي غيابه طعني



(143)
.
.

.




طعني يحسب أنه ماطعني
________ وانا ضاري على الطعنات قبله


زماني كاسرٍ ضلع التمني
________ جناح الروح طار وعشت نهله


أدور للعذر بعضي ومني
________ ولـ عيونه صعاب العذر سهله


حياتي كلها لجله تغني
________ وعطر الروح فاح .. وفز لجله


دخيل الله تعال وقول عني
________ مطر مجنون والشوق استحله


(144)





.
.

.





استحله واستحل اللي معاه
__________ مابقى بالقلب شي .. الا معه


لو منعته عن خفوقي مانساه
__________ ولو منعني عن خفوقه بمنعه


اتفقنا ... نسكن الحلم وشذاه
__________ واختلفنا .. من يموت بمدمعه ..!



(145)






.
.

.





مدمعه جمر وعروقه من الريح نار
____________ يازمان العجايب هات بعضي وروح


كل ماآعاند المجروح وأكسر جدار
____________ يطلع بليل روحي .. جدر يبني صروح


هيه ياحلم توَي .. ماجرحت الحصار
____________ وانت داخل عيوني ... تستلذ الجروح


هي مثل ماهي الدنيا شموع وقطار
____________ هي مثل ماقريتي .. روح تحتاج روح


أدري أنك على غيم الشقا بانهيار
____________ وأدري انك بـ قلبي تشربين الوضوح


أدري انك عظيمة في عيون النهار
____________ وأدري انك شعلتي بالمساءات ضوح


وانتي أدرى بقلب الما وهمس البحار
____________ وانتي ادرى بصدرٍ ذاب .. ماتاب بوح


والله انك بعيني .. دار عن ألف دار
____________ والله أنك بروح السيل معنى الجموح


أنتي البحر بكنوزه .. وآنا لك مدار
____________ في يمينك نهار ... وفي يسارك طموح


أنتي السيل وعيونه وحزن الجدار
____________ أنتي الما وانا زحمة مطر وسط روح ...!



(146)





.
.

.





ياااروح كلي حلم .. والحلم غربه
____________ تسرق من عيوني تفاصيل واحساس


ياااروح غصت روح والليل كربه
____________ ياااروح كم باقي على عطر الأنفاس


ياااروح بيدي حلم ماطار سربه
____________ يمطر جناحه نور .. وتحنَ الأقـواس


إما تعال أشرب من الحلم شربه
____________ ولا تعال وخذ من الحلم .. حراااس


يعني دخيل الليل .. مليت حربه
____________ ومليت مني يوم أنا .. زحمة أجراس


خذ من مسائي مايكفيك غربه
____________ وعطني صباحٍ ما يعرفونه الناس ..!



(147)





.
.

.




الناس أنفاس وورق ..

وانتي عيون الناس ..

والأنفاس ..

واحساس الغرق ..!






انتي قبايل من ورق ..

كل ما أحس أنك أنا ..

أقراك في دفتر جروحي

دمع واشواق وأرق ..!






هذي مداين لهفتي ..

شمع وبقايا دمع

والنرد الغبي ..

بكفوف شوقي ..

ضج .. وبحزنه فرق ..!






ياااروح ماباقي وطن

يسهر على صدري

ولا غيرك برق ..!






أنتي جنون الإحتمال

وبعض من فيض الوفا

قصدي غفا

بعضك وباقي داخلك

طفل اندرق ..!






أما أنا

ماني أنا

يعني بكل الإختصار

أنتي أنا

واللي بقا لي من بقاياك القليله

ماااء في حلق الورق ..!



(148)




.
.

.





الورق / والماء / وأنفاس الغريب
_____ والحنين .. وشوقي السافر عنا


شارقه فيني ... وأنا كلي مغيب
_____ ياحياة الموت وش بيدي أنا ..!




(149)





.
.

.






( أنا ) تنقال لاحسيت فيها
_____ و ( أنا ) بيدك وتذكرني عطيتك


عطيتك روح غيرك يحتريها
_____ فديتك قلتها .. واقرا ( فديتك )


فديتك بالعيون اللي تجيها
_____ فديتك بـ السنين اللي هديتك


فديتك بالجروح ومايليها
_____ فديتك بـ الصبر دامي بكيتك


فديتك بالعروق اللي عليها
_____ وسامك بعد ما / دمي سقيتك


فديتك بالأماني تكتسيها
_____ فديتك بالأمل .. واقول ليتك


فديتك بالليالي وارتويها
_____ بغربه سافره منها ضميتك


فديتك قلتها وآحس فيها
_____ فديتك آه ..لو تفهم ( فديتك ) ..!



(150)






.
.

.







فديتك يا أمل واقف على باب التمني ..
وأغني كل مارفرف جناح ولاح بارق ..
مطر ولا خيال وهمس حزن وتمتمة أغلا البراويز
العتيقة في حنايا روح مرمرها التعب ويضيع حلم ..!
والتفت لي واحتريني في نوافذ ياس كسَرها العنا
والريح ظلم ..! ياعناوين الحروب وفتنة الأرواح
بأبواب السما يكفي مطر .. ماعاد بعيوني مسا
 يشبه مساك .. ولا عاد بايدين الغريب إلا جفاف
الشمع .. والدمعة تروب ولا يتوب الشوق واحلامي بكر ..
 مافض غربتها سوى همسك ونبض القهوة السمرا ..
 وسال الليل ..!









(151)





.
.

.




الليل .. باقة حزن بعيون الأغراب
________ والصبح .. نوره مثل الأحلام غايب


دنيا على بال الرضا .. همَ حطاب
________ ودنيا على بال الزعل .. موت رايب


ماعاد لي فيها سوى سرقة اصحاب
________ أضحك لها / في عز رقص الطلايب


ماهمني من جا ومن راح بثياب
________ يــكفي عـراهم بينهم .. ورد خايب


ياااروح وينك شوفي الناس باشناب
________ لكنهم نـسوان .. في ثــوب شايب


ماياخذون من المطر روح واسباب
________ ولا ياخذون الا .. متاهة خرايب ..!






.(152)





.
.

.





خرايب هالزمان أكبر مصيبه
______ وكل الناس تشكي مـ الخرايب


دروا أو مادروا أنك حبيبه
______ أنا (والله) ... ماني عنك تايب


لحالك ساكنه والقصر ذيبه
______ عوى لك ماء والغربه نصايب


دخيل الليل باقي فيك طيبه
______ خذيها .. والبسي بعض الهبايب


تعالي روح تتمادى قريبه
______ تعالي حضن في وقت العجايب


تعالي نار ولا عطر هيبه
______ تعالي بس .. وأهديك الغرايب


تعالي مااء في غيمه رهيبه
______ تبلل خاطر اللي فيك ... ذايب


يقولون الهوى عندك مصيبه
______ وأناآقول الهوى أحلا المصايب



(153)




.
.

.





المصايب ليل ليل .. ولا تدفيني عطور
________ كل مابالأمر نورك ... غاب والظلما قدر



الجفاف اللي سكنته فاض مابين السطور
________ واعتلا سيل المواجع روح غناها الضجر



يا أميرة / يا حبيبة / يا عناقيد البحور
________ ليت للأشـواق كف / تلم سـلطان البحر



علميني كيف أجيك ولا يكفيني حضور
________ ودي اسرق منك كلك وأتمادى بالسهر



هي كذا الدنيا مصايب ماتجي كيف الشعور
________ ولا انا وانتي نوينا / نهدي الشمس القمر ..!



(154)




.
.

.





القمر سلسل مداه ..

واعتنق شمسك وعاشرني نهار ..!

وش يعيد الفجر بنت اربع طعش ..

غير الصباح المارد الأكثر حصار ..!


لا حلوم ولا قطار ..

ولا سفر بيد الزمان ..

وغصتي حيرة على باب التعب .. قمرا ونار ..!


وين أروح ..

وروح روحي بين حلم وبين مبدأ ..

.. يستمد الموت من زحمة غبار ..!


ياحبيبة وين اروح ..

وين اروح .. وشمعة احلامي على بابك ..

وريح الظلم ترميني ..

ألملم في شرايني ..على حوض انتظار ..!


لا دموع ولا فنار ..

ولا حقيقة تلغي الأكثر غرابة ..

منك ..من كونك ..

ونورك يسبق العالم ..

ويهديني جموح الإنتصار ..!




(155)



.
.

.



الإنتصار بنجمة الصبح سهران
_______ وأنتي على باب الضيا صبح ثاني


أية هزيمة تعترض كف الأنسان
_______ مادام صبحه ضج / عطر وأماني


نورك وطن وانتي سنا كل الاوطان
_______ صبحك مطر .. وأنا مع الما أناني


يعني /بروحك نكهة الورد سكران
_______ يعني بروحي فاح / شوق وأغاني


يعني /فديت الصبح بعيون ذبلان
_______ يعني /فديت الروح باقصى حناني


يعني / أحبك حب ماحبه انسان
_______ أنتي وطن أول .. ولا فيه ثاني ...!



(156)





.
.

.







ثاني مطالبك بآبيحه
______ وأول مطالبك يسأل وين



أثنين قهوه على الريحه
______ والدرب لـ عيوننا الأثنين



ياصبح بك نسلم الطيحه
______ هي روح .. لكن لها قلبين



نورك لـ هالنور تسبيحه
______ حبك وكل البشر بعدين ..!