أوراق ممطرة الجزء الثامن عشر

(264)





.
.

.





سفينة حلم والذكرى بحرها
ألا ياحلم تكفى تحتويني


تعبت الإنتظار بكل ليله
ولا ليله تمر الا تجيني


جنون ارواح يتوطن سمايه
وروحي جمرها وقاد فيني


رياح الموت ماخلت غصوني
حياة أموات في صبري وليني


حنين عيونها في كل خطوة
ألا يااارب وش تالي حنيني ..
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(265)




.
.

.





حنيني شمعة الغربة وصبحٍ يسرق الأنفاس
حنيني شهقة الذكرى / مطر معقود بانفاسي


ألا ياشمعة الخاطر ألا ثورة الاحساس
جنون الحال ماخلا الغرابة تهدم احساسي


دريت وماقريت أنك حياه لكل ذول الناس
لأنك باختصار الكون كل اقرابي وناسي ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،



(266)




.
.

.





ناسي وناسك مالهم خص فينا
دام الجروح جروحنا مايهمون


الناس لو يدرون وش محتوينا
ماخلو انفاسك عليّه يمرون


العمر مبحر والمتاهات مينا
لاوين والمينا خطاوي بلا لون


احلامنا دمعات تسأل علينا
إلى متى والدمع مافارق عيون


إلى متى والغيم مايرتوينا
إلى متى وغيابنا حزن وطعون


فينا ثمار عقول ماتحترينا
إما قطفناها أو الوضع مجنون


وفينا حنين وقيد كبل يدينا
من يطلب الأرواح لاعاد يبكون


هذا جنون الحال لو ماشكينا
الله يدري مانبي الناس يدرون ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،




________________________________________
(267)





.
.

.





يدرون مايدرون وش صار بالنار
دام الفراش يموت في زحمة النور



دربين فيهم موت وش فيهم اختار
دام الجفاف الحل .. بآعيش ممطور



بلقاك في ليلي مطر يغسل الدار
وبالصباح انتي مواويل و طيور



أنتي سقيتيني فرح يشبه حصار
وآنا سقيتك بالأمل درب وعبور



أنتي لحالك سرَ ماغيرك أسرار
وانتي لحالك مالكه بسمة الحور



أنتي حياة النور في ظلمة أنوار
وانتي الوحيده / نور مايشبه النور ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(268)




.
.

.





النور / سرَ عيون .. ماتشبه الليل
والليل / زحمة نور بـ عيون الاحباب


لا والذي سواك .. ماخالطك ميل
وانت استقامة روح في ليل الاغراب


أحب فيك .. دلال الافكار والهيل
وأموت في طهرك اذا صرت مرتاب


أنت المطر وانت الوفا داخل السيل
وانت الوحيد اللي له الصدر طلاب


تعال فيني روَض الدرب لـ الخيل
ماعاد للفارس ولا رمح ينهاب


كلي ذبول .. وداخلي قسوة الليل
وانت الصباح بثورة الليل ماغاب ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(269)




.
.

.



ماغاب نورك ياضيا كل الأنوار
دامك بروح الروح ماغاب نورك


دارك عيوني وانت بعيوني الدار
ماعاد يفرق عن غيابك حضورك ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(270)





.
.

.





حضورك ..

زحمة أمطار وفرح

يعني أنهمارك ..!



حضورك ..

يشبه البسمة بعين الطفل

صبح العيد

وعيونه ديارك ..!



يا نهار الناس

ياغيث القلوب الحايره

كم لي .. وكم للريح

تطعن في حصارك ..!



ماتعبت ..

ولا تعب صوت الأمل

في يوم يمكن ..

يلتفت حظي عليَ

ونهدم أسوار انتظارك ..!



ياحبيب النور

ياصبح المدى

يامدى النور الحبيب الصبح ..

لاتسلب نهارك ..!



خلك الضي الفريد العذب

موال الشروق الدافي

اللي يسقي عيون السنين

أعذب شعور ..

ولا رواه الا انصهارك ..!



ياحبيبي

ياغرام الما

وروح الما

وطيش الما

ونبض المااااء

كلي لك ..

وهذا هو اختصارك ..!

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(271)





.
.

.





أختصارك واختصاري.. كلمتين :
" أنت أنا " .. والباقي انفاس وجسد



قلت : ( أحبك ) كثر ماعاش الحنين
وعشت ( أحبك ) كثر مامات الوعد



لاتلاقينا .. في أنصاف السنين
ولا تباعدنا .. و لا شفنا سعد



انتظارك وانتظاري .. في أنين
لا سماء / ولا غيوم .. ولا رعد



كل صبرالناس .. في كفي يلين
لجل عينك .. كل ماحولي / مدد



لو تغيب العمر ماشفتك بـ عين
أنت عايش في عروقي لـ الأبد ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(272)





.
.

.




لـ الأبد مالك شريك / إلا أنا
لاوطن لا أرض لا كل البشر


وحدك عيون الزمن / صبح ودنا
أنت شمس الروح لاهان القمر ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(273)




.
.

.





القمر .. يسأل عن أخبارك
والضيا .. مهدود باحضاني


في غيابك .. حاضره نارك
عاديات الحزن .. تغشاني


واحشتني بسمة ازهارك
كل كلك .. شوق يقراني


لون روحك ذاب بحصارك
وبالغياب آضيع بالواني


كل ذنبي / متَ باقدارك
وكل ذنبك / عشت ترعاني


غربتي / تشتاق لديارك
وغربتك / بالوجد ترواني


أيه " أحبك " كثر مازارك
الحنين لـ تربة اوطاني


ياحبيبي .. عطني اخبارك
كل يوم آموت .. باحضاني ..!





.
.

.


أبو فهد .. حياة .. المسافر


لكما قوافل من الشكر والورد والتقدير
،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(274)





.
.

.





باحضاني ابني لك مداين ورد .. واسرج لك خيول الليل .. واتفاءل معك .. بالنور .. بالأحلام .. باغلا ماملكت .. ولاملكت إلا هواك العاتي النور المبين السيل .. وآنا السيل من نبض المطر بعروقك .. الخجلى ..وبعروق السنين الغايرة ملح وجروح .. ولملمة أقدار .. تشطرني وترميني على جال التعب .. حزمة مطر ..مهدود حيله .. وانت مواله .. وموال الفرح لاجا يداعبني ويسرقني ثواني .. ثم يجرحني بغربة من شموخ الروح .. تسرقني من العالم .. من الدنيا ومن كل البشر.. وانسى وأجيك ..!
لاتقول الموت بحضوري وبغيابي أبيك .. كل مافيني يغطرف لك .. ويتثنى وجع .. ويموت لك لأجلك .. ويحيا بك بقية جرحه الطاهر .. ويذكر كل مايمكن عبوره في متاهات السنين .. ولا حنين إلا معك .. لك .. دام روحك كل روحي ..وكل ما بيني وبينك سور من دنيا غبية .. وش بعد نبكي عليه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(275)





.
.

.





عليه نور من السما يشبه النور
لاشمس تشبه له ولا نور زيه



هذاك ماغيره مطر بلل الدور
هو كل ما املك ومافي يديه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(276)





.
.

.





يديَه لَونت لوحة غرامي
ولا لون ابتهج بين الأصابع


رسمتك بالعروق ولانسيتك
طبعتك داخلي باغلى المطابع


نسجت الروح بجنون المحبة
ولا خليت لك ثاني ورابع


لحالك في سواد اللوح تمشي
بياض وحلم ماحولك توابع


تضم الغيم وآنا في رجاتك
وتنهرني ظروفي كيف آتابع


وتمطر في سنين الجدب روحك
وآنا كل المطر فيني منابع


دخيل الليل وعيونك ورسمي
خذ ايديني ولوَن بالأصابع ..!