(359)
.
.
.
الأجمل منك " قدرك "
في متاهة قلب
لوَعني
رضى منك القليل
وعاد بك ..
يفقد هدوئه واتزانه ..!
وش بعد نصبر عليه
ودمعة الغيمة
جمر
فيها عيون الما
تعيد الما
لحزنه وامتهانه ..!
ما ألومك
لو أموت
لأنك أجمل روح
لمَت صبر هذا الكون
في لحظة أمانه ..!
أنت غير
وكل حسن الناس غير
أنت بـ الوان الفرح
بسمة طفل
تعزف شفايفه البراءة
سين صارت ثين
في حزة زهوَ
طاحت حروفه
واخترب فيها لسانه ..!
أعترافي
لك قليل
وانت أكثر من مطر
ديمه / أمل / حلم
ابتدا ..
يوم أعتدى ..
طرفه .. وبعثرني حنانه ..!
خذَ من اوقاتك أنا
كل الهنا
خذَ دمعة العاشق
مع شوق السنين
وهمَل الحبل الحزين
أركض
مع صبري
وروَض لي حصانه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(360)
.
.
.
حصانه يحمل أوزار اشتياقي
وانا فارس وكفَي ماوصل له
ولا بيدي رسن والدرب شاقي
ولا حولي رحايل مستقله
ضماي البيد والغيمة عناقي
ومابين السما والأرض عله
أطير بها وأرتب في فراقي
وأجيه بذل شوقي واستحله
أموت بنظرته وأعيش ساقي
غصون الصبر وجذورٍ تدله
أنا شمعة لعينه واحتراقي
نهاره .. لا بدا ليله يذله
عظيم الوجد بالتحنان راقي
يعيد اللي كسره الليل كله
نسيته في عروقي والسواقي
تسامرني على شمسه وظله
ولامن قلت "روحي " قال باقي
معك " روحي " وصدرك من يمله ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(361)
.
.
.
يمله..! من يمله نور عيني ؟؟
وانا وش هي حياتي دون عينه..؟؟!!
أنا ماعاد .. تحفل بي سنيني
مدامه مـ اهتنا باقي سنينه
سؤالي وينها انفاسه / و ويني ؟
وانا في طيفه أسأل عنه وينه ؟؟
لي الله .. دام بعثرني حنيني
وهو له .. رب يدري عن حنينه ..!!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(362)
.
.
.
حنينه سيل
وآآنا السيل
ولا أدري ..
من اللي سارق الثاني ..؟
تعبت أحلم ..!
تعبت آحنَ وألقاني ..
على خيل انتظاري
سيف شوق
ودرع ذوق
ودمع يتهجا لساني ..!
أييييه ياكثر الأماني ..
كل أنفاسي أماني
كل خطواتي أماني
كل همسة روح
في رمضا الجفاف
تعيد لي غيم الأماني ..
واستعيد الصبر
في حرب المشاعر
وانظم عروقي أغاني ..!
وانتظرك
وكل شوق الناس
في لحظة دفا
فيني
ويسألني عليك
وكل ما حاولت أنسى
جيتني ذكرى
على غفلة حزن
تقرا خطوط النبض
تقراني أعاني ..!
آآه منك ومن زماني ..!
مابقى في ساحة الأزرق
مدى
أو هو المدى صارالوجع
وأنت ابتهالات الولع
في حفلة الأيام
وحصار الثواني ..!
خذ من عيوني دروب
وخذ من احضاني مواني ..!
بس تكفى لاتغيب
وتهدي انفاس العليل
الموت
في رحلة ضيا
منها بديت آدورهالعالم
واحس اني خرافة عشق
أسطورة محب
ولااا دريت
أني على جمر الصبر
واقف مع حلمي
مكاني ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(363)
.
.
.
مكاني عارفه / وأعرف مكانك
رفوف الغيم .. تشهد لك وليه
تموت أحلام بغيابك .. ولكن
يعيش النبض / وثيابه زكيه
كتبت من المطر / قصة عذابي
ولمَيت التعب .. صبح وعشيه
أنادي لك / ويرجع لي صدايه
مثل نعش الولد بعيون خيه
وأدور عن عيونك في عيوني
وألاقي ... ظلمة الدنيا عليه
دخيل النور / يانور الأماكن
ولا شبر بحياتي بان ضيه
بدونك / كل هالدنيا ملامه
مغير ... آصفف عروقٍ أبيه
وأسامر غيبتك والطيف روحك
وأبدَل .. نجمة الليل العصيه
ولاجا الصبح / حسيتك بقلبي
واسافر بك معي / روحه وجيه
ألا ياكل مابي .. من شـظايا
تعال .. نلون حمول الشظيه
تعال اسكن مكانك وانت تدري
مكانك بالسما .. في روح حيه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(364)
.
.
.
حيَه عروق الغلا .. وان مات وصلك عمر
يكفي عيوني بطيفك .. تستلذ الحياه
مثل الضرير ان سمع / كنه يشوف القمر
وهو يعيش بخياله .. كل نورٍ نساه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(365)
.
.
.
نساه قلب / وقلب .. مايوم ينساه
واللي تذكر .. ضاع في ذكرياته
كل الجهات / يشوف رسمه وممشاه
وكل الدروب / تعيش فوضى جهاته
هذاك ماغيره .. سكن غصن فرقاه
وانا بغصن الموت / همَي حياته ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(366)
.
.
.
حياته ..
بين ترتيب الجروح
تفوح
تترنم غرابه ..!
كتابه ..
كل مايملك وفا دافي
وبعض انفاس
تتمايل على صدره
بخمرة حلم
تهديه الكآبه ..!
من سكن فوضاه
لايسأل عنه غيره
ولايسأل أهو غيره
يكفيه المدى والملح
بضلوعه
تعيد الجرح
طفل ودمع
يعني شمع
ملَ الليل ..
واحضان الكتابه ..!
لا شبابيك الزعل
تهدي أجل
لا ولا تهدي أغانيه الصبابه ..!
وكل باب
يصيرناب
وكل مايطري عليه الحلم
يتمادى ولع
ويعيش دمع
بغصة الحاضر
يسولف لـ اغترابه ..!
هو كذا معنى الحياة ..
من متى تصفى
متى ننسى مساء الصبح
وجموح اقترابه .!
كلها زحمة قدر
وين المفر ؟؟
واحنا على مفرق حنين
نعيدنا أشباه فرحه
مالقت معنى الفرح
ليله
ولا ليله
ثياب الحزن خلتنا
وعشنا يومنا
صافي
ولا شفنا سرابه ..!
كم نقول
وكم نطول
وكم نعيش أحباب
في صيغة ممات
أبعاد
تجرحنا المسافه
والحسافة
لالقيت أقرب قريب
يلوم حالك
وانت في معنى الصبر
تحتال
أوتختال
تتمنى عروقك
ماتعيد أحلامها
وتثور
وتشكل عصابه ..!
مايعيد الما
لعين الما
سوى بعض المطر
لاهلَ بك
وانثال بك
واخترت صمتك
يصبغ الوان الدقايق
وسط لوحة عمر
تهديك أزرقك
وتعيد لأنفاس المطر
همس السحابه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(367)
.
.
.
السحابة / والغياب المرَ / وطعون السنين
وغصة الدمعة / وشوق الما / وتأثيث المسا
كلها تسأل عليك ..! تعيد لي صوت الحنين
وكلها تبكي عليك ..! وحلمها .. علَ وعسى
من عيون الصمت / طيرت الأماني بالأنين
واستفاق الجرح بعيوني .. وجرحي مانسى
كيف ينسى بك عيونه / والضيا / والياسمين
ومن يغني شرهة الما ..؟ في تفاصيل الأسى
ياعيون الما وروحه .. ليه روحك ماتلين ؟؟
من تمادت به عروقه ماعرف وجه القسا ..!
.
.
.
(368)
.
.
.
القسا .. ماله شبيه من الوصال
ولاشبيه لغيمتك / بعد الهطول
كل ماأفتح من ابوابك / جمال
ينفتح مليون باب .. من الذهول
وكل ما أقرا بعينك .. مايقال
كل وادي في عروقي له سيول
وكل ما أقلب .. تفاصيل المحال
يبتسم خصرك / على كل الفصول
وحدك الي ماسكه .. معنى الجدال
بين .. مايمكن نقول / ولا نقول
لاذكرتك .. طاح من عيني جبال
ولابكيتك .. قلت / ياكثر الحمول
علميني عنك.. كم باقي احتمال ؟
وكم بعد بالعمر / ماطاحت خيول ..!
.
.
.
(369)
.
.
.
خيول صدري / عليك تعن
صهيلها ... عله بـ عله
أشوف هذا المسا .. ممتن
لـ الحزن في خافقي / سله
مدري من أسأل بعد هالظن ..!
وش حال من ذاب في خله ؟
بعيد بين الضلوع .. يون
ويعيش شمسي .. وانا ظله
هو كل ما احتاج له من فن
سبحااان من صوره / كله
لو تسأله : من عليه تحن ؟؟
بيقول .. مجنون عبدالله ..!
ليست هناك تعليقات:
إرسال تعليق