أوراق ممطرة الجزء الواحد والثلاثين

(410)

.
.

.





عادي جموح البرد في دمعة العين
وعادي يعيش الجمر / بارواح حيه


عادي طموح المااء مسكوب للحين
وعادي مسا التفاح .. مجنون غيه


اللي غريب .. إني مع كل تخمين
أرقا السما .. وألقى الجفاف الهويه


البرد غافلني .. مع فزعة الطين
ولباس صدري / زمه البرد زيه


الشوق باحضاني تقول / المساكين
والوصل حاتم .. والمسافه عصيه


ياشين حضن البرد / لامرمر اثنين
وياشين جمر الشوق / بارواح حيه ..!

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(411)


.
.

.





حية تفاصيل اللقا .. والنور واحساس الجنون
أو هي أحاسيس الفرح ولاّ الغيوم الصاخبه


أحس كل اللي بقى .. طاغي على متن العيون
واللي مضى لحظة رضا / تشبه حنوّ الراهبه


يا فتنة الحاضر ويا روح السنين اللي تمون
البرد وجنون الجمر .. في داخلي متصاحبه


أبنتظر بعضي وبعضي فيك .. مايمكن يكون
إلا معك يوم أجمعك ..عند السماء السابعه ..!



،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،



(412)


.
.

.




السابعة بعد الضيا
والناس فعلا نايمه


حسيت مالي أخويا
إلا العيون الهايمه


صباحها ماهو ريا
الروح صاحت قايمه


النور عشق الأشقيا
والليل دمعه حايمه


صباح نهر الأذكيا
وسط الحقول العايمه


ذابت عروق الأقويا
بين الحنايا الغايمه


روحين باجساد أبريا
عاشت ولكن صايمه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(413)

.
.

.




صايمه رحلة الما / والتعاويذ نبض
حسبي أن السفر عاشق .. ودربه سما


غربة الغيم لاحت .. والتفاصيل أرض
المطر لاسقاها .. قال فيني ضما


احتياج المطر ثابت .. وللروح فرض
والعطش فاض وعيون السفر للعما ..!


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(414)


.
.

.





العما للخطاوي / والشقا للدروب
والرضا مالقيته في جيوب الغياب


كل لحظه بدونك .. تحتفل بالغروب
وكل شمسٍ بلا نورك صباح اغتراب


الليالي لئيمه .. والعزا للهبوب
والمسا دون جمره / حلم مافيه باب


كل ليله سفر .. كني أسير الذنوب
وكل ذنبي / حياة أرواح تمطر عذاب


أهطلي يادموع الغيم .. يمكن نتوب
يمكن أن العزا يلبس ثياب السراب


عذري / ان المحبة في عروقي تذوب
وعذرها / يوم قالت : كل مافيّ ذاااب ..!


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،




(415)



.
.

.





ذاب عاشق / وطاح الجمر في راحتينه
واستوى كل من فالأرض / بعد الجنون


استفاقت طيور الملح .. وارسل حنينه
يهدي الغيم بعضه .. يوم قالت : تمون


هي بحر / واستراحت فيه غربة سفينه
وهي مشاعل من اللاهمس .. بين الجفون


لاتمايل هدبها .. صار / قصة مدينه
تحتفل بالجمال .. وتحتفل بالعيون


خصرها .. مستقيم الميل فيه السكينه
وفيه من تمتمات العدل / شيٍ يخون


كلها فوق بعض تقول / ورده حزينه
كل مافي غلاها قال / كان .. ويكون


حبها فوضوي العطر / تزهى سنينه
وقدرها فوق نجم سهيل .. ماله ركون


هي مدى للمدى / والنور فيها رهينه
هي سماء المطر / والما حياة الحنون




،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،



(416)


.
.

.




الحنون النبض .. وانتي مصدره
وش بعد ينقال في نور الصباح ؟؟


والله ان الشمس فيك / مخصره
أنتي المصدر / وهي حولك وشاح


جوهرة في جوهرة في جوهره
هذا هو أسمك .. ولا فيها مزاح


حظي المجنون .. عاش بشوشره
وابتدا في روضتك / يبني سماح


كل ماعانيت .. صبر ومرمره
تبتدي فيني .. مواويل الرياح


وأعتني في نبض .. ربي حرره
واهتني بك / في دروبي والمراح


قلب روح / وشمع وافي ما اكثره
المدى أجساد .. والروح الضواح


ماحضنتك زيف .. والا سمسره
ماحضنت الا عيوني .. والجراح


العروق بشوقها .. في جمهره
وفي عيون الناس / مافيها رماح


مادروا عالنبض .. وشهو مصدره
ولا دروا وش تعني عيون الصباح ..!


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(417)

.
.

.





الصباح ..! أجمل مواعيد الفرح
وانتي أجمل نور / في هذا المسا



لاذكرتك .. قلت : منهو اللي انجرح
ولانسيتك .. صرت ما اشوف النسا ..!


،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

(418)


.
.

.




النسا نص المسا

والباقي أنفاس الأسى

يعني

زجاجة عطر في عمر الغريب ..!


الشذى ويل الوله

والشوق من يستسهله

وحكاية البرد العظيم

أكبر من جموح الأغاني

والأماني

واغتيال الحلم في رجفة حبيب ..!


لاتقول اشتاق

أدري بك أنا

أعرفك واعرف مداك وأولك ..

وأعرف بأنك في عروق الليل

تسري بي وتبقى بي قريب ..!


بس السؤال المرّ

وش باقي من احضاني

وهذا البرد يسلبني

تفاصيل اتجاهاتي

مداراتي

حكاياتي

ويهديني مع ليل التعب

فرحه تغيب ..!


ياسيدي

يا آسري

ياكل ما أملك من الدنيا

ولا أملك معك غيرك

ولاغيرك وطن

قلي متى حظي يصيب ..!


تعبت أجدف خاطري

في كل ليل

تعبت أسمي دمعتي

طوفان سيل

تعبت أغص من التعب

وابني من ضلوعي : صبر

ويضيق بي ..

الكون الرحيب ..!


حبك قدر

ماملّ يسألني تعال

ولا يملّ يزيدني مني ألم

ويعيش بك كل العمر

وآدللـه

وأعنّ له

ويزيدني صبري غوايه

واحضن اطياف النصيب ..!


لامتى وانت السنين ؟؟

لامتى وانت احتمال النبض

وانت النور

كسر السور

تعريف المطر

يعني

مسا غيمه

تهل الما طرب

وتعيدني طفل انجرح

في خاطره حزن وفرح

في خطوته

كل اتجاهات المدى ..

شمس ومغيب ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،


(419)


.
.

.





مغيب الشمس مايشبه غيابك
لأنك ماتغيب .. تعيش فيني


نهارك في عروق البال دايم
من أطيافك عطيت الكل عيني


نبت شوك الغياب بكف عاشق
ومن روحي سقيته في يديني


سنابل هالغياب تموت حيه
وانا بينك وبيني .. محتويني


أداري هالسنين اللي تباعد
وألمّ اللي بقى لي من حنيني


"تعب" ماهي مجرد حرف زايد
"تعب" يعني تعب يحرق سنيني