(430)
.
.
.
أحضان / ويعيد السفر رحلة الما
واشتاق لي .. وآآنا معك كل ليله
مهما تغيب .. وكل ماجات ظلما
نورك بصدري / والمشاعر فتيله
غايب بروحي عمر / والغايب أعما
وحضور نورك .. سرج محتاج خيله
اسمي معك " مجنون" ياليت الاسما
تنصف عروقي .. والمسافه قليله
" تعال" و " اتحداك" لعيون سلمى
تبقى مطر / والسيل ماراح سيله ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(431)
.
.
.
سيله وفا
وانتي دفا عمره .. أمانيه الكبار ..!
لاحصار
ولا تعب
وانتي معه
وشم العروق النابضه بالنور ..
واحساس النهار ..!
ويش أقول لروح تسحبني معي
وآآطير حنّيه لها
وآنا لها طير الأماني
واختيار الروح عن كل اختيار ..!
ماسألتك يوم عن قدري
وانا أدري
عن احساس الأصابع
والطوابع
قبلة وشوق وزرار ..!
الشموع ضلوع
واركاني / حناني
دمعتي / كلي
عناويني
تدور للزمن بعض اعتذار ..!
ماله عذر
وانتي بعد مالك عذر
وآآنا معك مالي عذر
واللي سلب كل العذر :
روحين ترقص في ابتسامة غيم
والقطرات تسأل عن مسار ..!
الأسئلة دايم غبيه
والإجابات انتهت
دام القدر
ماله عذر
واحنا بكل جروحنا : دمعة سؤال
تجف فينا
لاعصينا العمر
قصّينا التذاكر للقطار ..!
آآه ماتبني فرح
واللي انجرح
واقف على حد الجنون
يعاشر ظنونه
عيونه
غصته
والليل يغزل من جفا أحلامه : جدار ..!!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(432)
.
.
.
جدار ..! ومخربش / مواويل ودروب
وغربه ..! تشق جدار صدري وتحتال
فيها السفر / يشرق عذابات وغروب
وفيها النهار / يغيب .. ويصيح رجال
عينه تساءل : كم بقى للزمن ثوب ؟
وتجاوب عروقه : بقى كذب واغلال
هذا الزمن .. ماهو لمن عاش حبوب
هذا الزمن .. للطيش / والغدر / والمال
والله .. لولا أني على الصبر مصلوب
لاركب عقوق الفعل في كل الأحوال
المبتدا .. يبني معه لـ الخبر طوب
والكسر يجبر .. لاغدا الذل سلسال
مدينة الغربة : غثا حزن / وهبوب
واطنابها .. خيال ماهوب خيال
عاش العمر غالب / وهو دوم مغلوب
ممسوح جوخ .. ولدغة الغدر تنثال
ياكبر حظ الليل .. لاصار مطلوب
وياشين حظ الحزن / والدمع خلخال
ياصاح .. ! هذا العمر واحد ومنهوب
عيشه على كف الأمل / صوت وجدال
وإياك تهدي للفرح / زحمة ذنوب
خلك على حد الأمل .. ماسك البال
يمكن تحس أن الزمن فكر مضروب
وتعيش كل العمر / وحدك على الجال
في وقتها تعرف متى الرمح مسلوب
وتخربش جدارك / متاهات وهبال
وتدري عن الدمعه / متى تغسل الثوب
وتدري عن الغربه / ليا صاح رجال ..!!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(433)
.
.
.
رجال عن ألف .. لبسه طيبه الضافي
ورجال عاري / ولو هو لابس الدنيا
لاشفت مثله / فرحت بصحبة الوافي
ولاشفت بعض العرب / صديت بالعنيا
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(434)
.
.
.
بالعنيا : أغمض عن عيوني واحضنك فيها
وأدراي كل مامرت .. نسايم طيش مجنونه
لحالك بس ..! بعروقي / أغاني وش أسميها؟
مطر / هتان ..! لاوالله .. حكاية نبض مفتونه
الحنها على طرق الحنين .. وهمس راعيها
وأدوزنها .. مع نور الصباح / ولمعة جنونه
وأغزل في شرايين المدى .. حبكة معانيها
واطير بروح تتهجا الحنين / وتعرف طعونه
يمر العمر مرّ / وسكّر اللحظه .. وماضيها
يعيش / يذوب .. بيدينه .. ويتمايل على هونه
واقول العمر لعيونه : دقيقه عشت أداريها
وروحه في عيوني دام روحي داخل عيونه ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(435)
.
.
.
عيونه ..! ترجمان النور الأجمل
ولا أجمل .. من لقاه / ومن عيونه
فديته .. كل ماطيفه سحرني
فديت اقواسه / ورمحه / ونونه
يجنن ..!! كل مامر بخيالي
مواسم غي .. تزهى في ركونه
مدارات العروق ..! تذوب حيه
ويحيا الصوت / في قمة سكونه
إلا منه مشى / ماشفت مثله
ليونه تحتفل .. وسط الليونه
كأنه .. لابس الدنيا لحاله
وغيره .. لابس الموت بمهونه
مشاعيله .. أمل واحساس غافي
تنامى في بهاه / وفي حصونه
أحسه .. اقرب عروقي لذاتي
واحسه بالدفا .. يصنع جنونه
هو الدنيا / وكل اللي طلبته
أيا دنياي : كيف آعيش دونه ..!!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(436)
.
.
.
دونه مساءاتي خيال
وآآنا على حروة يكون ..!
أشرب معه كل احتمال
واهدي صباحي للجنون
مابيننا شعرة وصال
ماشدها شك وظنون
تبحر مع الغيمه دلال
وتمون لعيونه تمون
كله على بعضه زلال
لو الضما زاد الطعون
نشرب هماج ولا يقال
خانوا وحنّا مانخون ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(437)
.
.
.
مانخون النبض / والما / والحياه
و لا نبدّل غيم يحيانا بـ غيم
تشره عروقي .. اذا بحيا سواه
وتشره الأنفاس / ويثور الهزيم
كل ما أملك من الدنيا .. رضاه
وكل مافيني .. يسميه : العظيم ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(438)
.
.
.
العظيم احساس عاشق .. بالحنايا شب فيني
وابتديت أطفي بنار الشوق / نار الأمنيات
الجمر قصة مسافر / ضاع / وعيونه سنيني
والحروف عروق تحيا .. بالأمل والذكريات
لاقريت النور يتمادى .. خيالك في يديني
والمس كفوفك / واداري خاطرك بالأغنيات
صبر مرّ / وصبر حرّ / وكل ماأملك حنيني
والقوافل في عيوني .. تحتري كل الجهات ..!
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
(439)
.
.
.
الجهات أغراب / واحضانك وطن
وين لي عطرك ؟ وأشمك واحتويك
كل ماغافلت لي .. لحظه شجن
راحت الأيام ..! في لحظه تبيك
أكتبك واقراك .. واشتاقك وأحن
واخسر الشمعه / وليلي يشتريك
كن مابالكون أحد غيرك سكن
وحدك آشوفك .. ووحدي أحتريك
لو تركنا النبض لـ غيوم الزمن
يرتويني هـ الجفاف / ويرتويك
مابقى بـ يدي عطا / غير الحزن
وش بقى لي من أماني في يديك ؟
خذ من الغربة مداك .. ولا تون
السحاب أقدار / والما يصطفيك
عطني أحضانك ترى مالي وطن
ودي آآآلمك / واكونك / واحتويك ..!
ليست هناك تعليقات:
إرسال تعليق